Çakla topu özüylə götürərək nəyə eyham vurdu?

"Sabah" Azərbaycan Premyer Liqasının 16-cı turu çərçivəsində ötən gün doğma divarlar arasında "Səbail"in qapısından dörd cavabsız top keçirib.

7 və 21-ci dəqiqələrdə "dənizçilər"in qapısına yol tapan meydan sahiblərinin mərakeşli mərkəz müdafiəçisi Sofian Çakla matçdan sonra Pressing.az-ın əməkdaşının suallarını cavablandırıb.

- İlk olaraq oyunla bağlı danışardın...

- Oyun yaxşı keçdi. Rəqib komanda da sonadək mübarizə apardı. Biz də bacardığımızı etdik və yekunda qələbəyə sevindik.

- Dubl etdin. Bu, həm də "Sabah" karyeranda bir ilk oldu. Bu haqda nə deyə bilərsən?

- Buna görə, ələlxüsus komandama kömək etdiyim üçün çox şadam. Gələcəkdə çalışacağam ki, daha çox qol vurum.

- Final fitindən sonra topu özünlə götürdün. Maraqlıdır, bunu nə üçün etdin?

- Baş hakim (oxu: Elçin Məsiyev) vurduğum bir qolu saymadı. Bunu referiyə eyham vurmaq üçün etdim (gülür).

- Son iki turdur ki, qol buraxmadan qalib gəlirsiz. Bu tempi ən azı fasiləyə qədər qoruyub saxlaya biləcəksiz?

- Əlbəttə, bunun davamını gətirmək istəyirik. Bunun üçün əlimizdən gələni edəcəyik, inşallah.

- Növbəti turda "Araz-Naxçıvan" səfərinə yollanacaqsız. Bu oyundan gözləntin nədir?

- "Araz-Naxçıvan" yaxşı kollektivdir. Bu matça xüsusi konsentrasiya olmalıyıq. Bu görüşdə də qələbə qazanmağa çalışacağıq.

Daşqın Əziz