Rəhman Hacıyev: "Kim gəldi, kim getdi, onun fərqi yoxdur" - AÇIQLAMA

"Neftçi" ötən Azərbaycan Premyer Liqasının 18-ci turu çərçivəsində doğma divarlar arasında "Kəpəz"ə 2:0 hesabıyla qalib gəlib.

"Ağ-qaralar"ın yarımmüdafiəçisi Rəhman Hacıyev matçdan sonra Pressing.az-ın suallarını cavablandırıb.

- İlin son oyununu keçirdiz. Fikirlərin necədir?

- Bütün oyunlara qələbə üçün çıxırıq. Çox xal itirmişik və bütün oyunlar bizim üçün çox vacibdir, ona görə hər bir oyuna xal üçün çıxırıq. İstirahətə çox yaxşı gedirik, çünki 3-cü yerə qalxırıq. 2-ci yerlə də xal fərqimiz çox deyil. Komandaya, özümə güvənirəm. İnşallah, çox yaxşı bir toplanış keçirəcəyik. İkinci dövrdə yaxşı oyun keçirəcəyimizə inanıram.

- Deyə bilərik ki, bu gün rahat qələbə qazandınız?

- Rahat deməzdim, çünki rahat oyun yoxdur. Sadəcə, yaxşı oynaya bilərik. İmkan düşdükcə, onu dəyərləndiririk. O da asan görünə bilər, amma belə deyil.

- Adrian Mutu "Neftçi"dən ayrıldı. Bu haqda nə deyə bilərsən?

- Bu, futboldur. Belə şeylər baş verə bilər. Adrian Mutu insan kimi çox yaxşı insandır. Məşqçi kimi isə yaxşı cəhətləri olsa da, pis cəhətləri olsa da, qərarı klub verir, biz də hörmətlə yanaşmaq məcburiyyətindəyik. Kim gəldi, kim getdi onun fərqi yoxdur. Biz peşəkar futbolçu olaraq bizim işimiz meydanda verilən tapşırıqları yerinə yetirməkdir. O barədə biz elə də fikir etməli deyilik.

- Fasilədən sonra fərqli "Neftçi" görəcəyik?

- İnşallah. Buna ümid edirəm. Fasilədən sonra da çalışacağıq ki, yaxşı mübarizə aparıb, avrokuboklara vəsiqə qazanaq.

Daşqın Əziz