Pas...

“Qarabağ” “İmişli” ilə oyunun “matchday” posterində klubun maskotu “Kəhər”i paslı dəmir konstruksiyanın üzərində əyləşdirib paylaşdı. İlk baxışdan adi bir dizayn kimi görünə bilər. Amma bu görüntü son zamanlar sanki klubun ümumi vəziyyətinin simvoluna çevrilib.

Bu, ilk belə hal deyil. Qışda Jeremi Qnalinin transfer videosu yayılanda futbolçu bazaya paslı qapını açaraq daxil olmuşdu. Həmin görüntü sosial şəbəkələrdə ciddi tənqid edilmişdi. İnsanlar haqlı olaraq soruşurdular: Avropada müntəzəm oynayan, milyonluq büdcəsi olan klub niyə bu qədər baxımsız və zövqsüz vizual təqdim edir?

İndi isə süni intellekt eyni mesajı bir daha ortaya çıxardı. Çünki AI emosiyaya yox, materiala işləyir. Ona nə göstərilirsə, onu analiz edib ortaya çıxarır. Əgər süni intellektin “Qarabağ” təsəvvürü paslı dəmir, köhnə konstruksiya və baxımsız atmosferdirsə, deməli, problem bir posterdən qat-qat dərindir...

Ən təhlükəli məqam isə budur: klub daxilində artıq bu görüntülər normal qəbul olunur. Görünür, Ağdam təmsilçisi bu atmosferə o qədər öyrəşib ki, artıq problem hiss edilmir.

Normalda Avropa klubu imici yaratmağa çalışan kollektiv maskotunu paslı dəmirin üzərində təqdim etməz. Xüsusilə də illərdir Azərbaycanın ən böyük və ən peşəkar klubu kimi təqdim olunan bir komanda.

Klubun akademiyaları normal məşq meydançaları problemi yaşayır, aşağı yaş qruplarında çalışan məşqçilər üçün yetərli şərait yaradılmır, infrastrukturun inkişafı isə illərdir gözlə görünəcək səviyyədə irəliləmir. Meydanda nəticələr gəlir, lakin klubun ümumi futbol yanaşması köhnəlmiş sistem təəssüratı bağışlayır. “Qarabağ”ın əsas problemi də elə budur: pas artıq təkcə dəmirdə deyil, yanaşmadadır...

Orxan İsmayılov