“Qarabağ”ın daha bir futbolçusu Braziliya klubuna keçə bilər.

Pressing az xəbər verir ki, söhbət Ağdam təmsilçisinin yarımmüdafiəçisi Pedro Bikalyodan gedir.

Bu haqda Braziliya mətbuatı məlumat yayıb. Xəbərə görə, 24 yaşlı yarımmüdafiəçisinin ölkəsinə qayıtmaq ehtimalı yaranıb. Belə ki, Botafoqo onun xidmətində maraqlıdır.

Braziliya klubunun baş məşqçi postuna gətirilən Davide Ançelotti dayaq yarımmüdafiəçisi mövqeyinə iki namizəd təqdim edib.

Bunlardan birincisi məhz Pedro Bikalyodur.

Braziliya təmsilçisu üçün hazırda prioritet Bikalyodur. Rəhbərlik 2026-cı ilin əvvəlində bu transferi reallaşdırmaq üçün rəsmi danışıqlara da başlayıb.

Lakin onların ilk təklifini Qarabağ rədd edib. Çünki braziliyalılar oyunçunu sonradan birdəfəlik transfer etmək şərtilə icarəyə götürmək istəyib. Qarabağ isə yalnız birdəfəlik transferə razı ola biləcəyini qarşı tərəfə çatdırıb.

Botafoqo isə bu keçiddə israrını davam etdirir. Cənubi amerikalılar ağdamlıların qapısını yeni təkliflə döyməyə hazırlaşırlar.

Həmçinin Pedro özü və meneceri də Botafoqo variantına müsbət yanaşır.

Qeyd edək ki, Pedro Bikalyonun Qarabağla müqavilə müddəti 2028-ci ilin yayına qədərdir. O, Ağdam klubuna bu ilin yayında Palmeyrasdan keçib.