Azərbaycan Premyer Liqasının 5-ci turunda keçirilən "Şamaxı" - "Neftçi" oyunundan (0:0) sonra meydan sahiblərinin baş məşqçisi Ayxan Abbasovun iştirakı ilə mətbuat konfransı keçirilib.

Pressing.az xəbər verir ki, o, ilk olaraq matçla bağlı danışıb.

- Evdə ilk oyunumuz idi. Nəhayət, Şamaxıda oynaya bildik. Rəqib "Neftçi" idi. İstəmirdik ki, məğlub olaq. Matç çox dinamikalı keçdi. Oyun baxımından komandamdan çox razı qaldım. Sona yaxın futbolçular yorulmuşdular, lakin qələbəyə layiq idik. Qol epizodlarımız da oldu. Şükürlər olsun ki, istədiyimiz komandanı qurmuşuq. Çempionatın sonunadək gərgin mübarizə gedəcək. Milli komandalara görə yaranacaq fasilədən də maksimum istifadə etmək istəyirik.

Abbasov daha sonra jurnalistlərin suallarını cavablandırıb.

- Transferlər üçün pulunuz bitib, yoxsa hələ qalıb?

- Pulumuz bitib, amma çalışırıq ki, nələrsə edək (gülür).

- Dördüncü hakimə nəyə görə etiraz edirdiniz?

- Köməkçi məşqçimiz ayaq üstə durduğuna görə sarı vərəqə ilə cəzalandırıldı. Dördüncü hakimlər oyunlara hərb disiplini ilə gəlirlər sanki.

- Çempionluğa oynayan komandadan xal aldınız. Bu mövsüm "Şamaxı"nın hədəfi nədir?

- Çempionatdan əvvəl hansı komandanın çempion olacağı ilə bağlı müzakirələr gedirdi. Büdcəsi avrokuboklara mübarizə aparmağa imkan verən komandalarımız var. Bizim kimi klublara böyümək üçün elitada qalmaq lazımdır. İlk növbədə Premyer Liqada qalmağa çalışacağıq. Ondan sonra da vəziyyətə baxacağıq. Hər şey büdcə ilə ölçülmür. Çempionatımız sürprizləri sevir. Əsas olan sonadək vuruşmaqdır.

- Azarkeşlərlə bağlı nə deyə bilərsiniz?

- Evdə ilk oyunumuz idi. Azarkeşlər sonadək komandanın yanında oldular. Düşünürəm ki, qarşıdakı oyunlarda əldə olunacaq sərfəli nəticələrlə onları sevindirəcəyik.

- Roman Qriqorçukla duellərinizi xatırlayırsınız?

- Bəli, əlbəttə.

- 7-ci duelinizdir və mütləq bərabərlik var.

- Bunu bilmirdim (gülür).

Daşqın Əziz/Şamaxı