"Şükürlər olsun ki, düzgün yoldayıq" – Roman Qriqorçuk

Azərbaycan Premyer Liqasının 5-ci turunda keçirilən "Şamaxı" - "Neftçi" oyunundan (0:0) sonra qonaqların baş məşqçisi Roman Qriqorçukun iştirakı ilə mətbuat konfransı keçirilib.

Pressing.az xəbər verir ki, təcrübəli mütəxəssis jurnalistlərin suallarını cavablandırıb.

- Bəllidir ki, nəticədən razı qalmadınız. Bəs oyundan?

- Təsdiqləyirəm ki, nəticədən razı qalmadım. Oyuna gəldikdə, futbolçuların bəziləri hələ komandaya inteqrasiya olmayıb. Bu cəhətdən axsayırıq.

- Əvvəlki oyunla müqayisədə hansı dəyişiklik var? Azarkeşlərə necə ümid verərdiz?

- Birmənalı şəkildə, əvvəlki oyunlarla bugünkü matç arasında fərq böyükdür.

- "Neftçi" beş oyuna iki qol vurub. Qarşıdan da milli komandaların oyunlarına görə fasilə gəlir.

- Bu gün çox qol vura bilərdik. Lakin epizodları qola çevirə bilmədik. Qarşıdan gələn fasilə komandamız üçün çox vacibdir. Obyektiv səbəblərə görə tam olaraq işləyə bilmədiyimiz məsələlər üzərində çalışacağıq. Əlbəttə, istəyirik ki, komandamız sərt şəkildə hücumlar yaratsın. Bu gün bunu müşahidə etdik Bundan da yaxşı olmasını istəyirik.

- Mövsüm başlayıb, lakin heyət cəhtdən "Neftçi"də hələ indi adaptasiya prosesi gedir. Sizə nə mane olur?

- Əlbəttə, hazırkı heyətlə təlim-məşq toplanışına başlasaydıq, komandamız 300 faiz daha yaxşı çıxış edərdi. Bəzi səbəblər var ki, belə başlamalı olduq. Şükürlər olsun ki, düzgün yoldayıq. Ümid edirəm ki, qarşıdakı oyunlarda zədəli futbolçularımız da sıralara qayıdacaqlar.

- Mübarizəni keyfiyyətə çevirmək üçün milli komandalara görə yaranacaq fasilə faydalı olacaqmı?

- Əminliklə deyə bilərəm ki, fasilədən sonra daha yaxşı olacağıq. Gəlin, emosional yanaşmayaq. Qarşıdakı günlərdə hər şey daha yaxşı olacaq.

Daşqın Əziz/Şamaxı