Misli Premyer Liqasının 21-ci turunda keçirilən "Neftçi" - "Şamaxı" matçından (1:0) sonra meydan sahiblərinin baş məşqçisi Samir Abasovun iştirakı ilə mətbuat konfransı keçirilib.

Pressing.az xəbər verir ki, mütəxəssis oyunla bağlı danışdıqdan sonra jurnalistlərin suallarını cavablandırıb.

- Çempionatdakı bütün komandalarla oynamaq çətindir. Asan oyun yoxdur. Bütün matçlarda bu cür əziyyət çəkməyimiz normal haldır. Hər iki hissədəki çıxışımızdan razı qaldım. Bu gün həddindən artıq nizam-intizamlı oynamağımız, rəqibə epizod verməməyimiz məni çox sevindirdi. "Şamaxı"nın heyətində də əlinə düşən epizodları dəyərləndirməyi bacaran futbolçular var. Bu da biz və digər komandalar üçün çətinlik yaradır. Azərbaycan kubokunda keçirəcəyimiz oyuna da köklənmişik. Bugünkü qələbə həmin matç üçün də bizə bir növ motivasiya oldu.

- Bu gün bir sıra futbolçuların, ələlxüsus Emin Mahmudovun performansında irəliləyiş gözə çarpdı. Bir həftə ərzində nəyi dəyişdiz ki, məğlubiyyətdən sonra futbolçular bu cür çıxış etdilər?

- Ötən turdakı məğlubiyyətin ən böyük səbəbkarı kimi özümü görürəm. Çünki özüm də reallığa yox, adımıza aldandım. Baxmayaraq ki, həmin qarşılaşmada da nizam-intizamlı çıxış etdik, lakin yenə də deyirəm, adımıza aldandıq. Və nəticə də göz qabağında idi. Bugünkü matçda reallığı ortaya qoyduq. Rəqibə epizod verməməli, həddindən artıq düzgün oynamalıyıq. Bizim də reallığımız budur. Xeyli iş görülməlidir. Bu, qapıçıdan başlamış, hücumçuya qədər olan bir prosesdir. İnşallah, qarşıdakı oyunlarda da "Neftçi"nin reallığını göstərməyə çalışacağıq.

- Etiraf edək ki, ilk yarım saat ərzində "Şamaxı" daha yaxşı çıxış edirdi...

- Ştoqrin xeyli müddət meydanda olmadı, daha sonra isə əvəzləndi. Onun yerinə meydana daxil olan Ervin Koffidə təngənəfəslik vardı, çünki birdən-birə meydana daxil olmuşdu. Bu amili nəzərə alsaq, rəqibə üstünlük vermiş olduq. Lakin sonradan matça nəzarəti ələ ala bildik.