"Futbolçularım növbəti oyunlarda daha diqqətli olmalıdırlar" – Rəşad Sadıqov

Misli Premyer Liqasının 20-ci turunda keçirilən "Şamaxı" - "Zirə" matçından (1:2) sonra qonaqların baş məşqçisi Rəşad Sadıqovun iştirakı ilə mətbuat konfransı keçirilib.

Pressing.az xəbər verir ki, mütəxəssis əvvəlcə oyunla bağlı fikirlərini bölüşüb. O, daha sonra media nümayəndələrinin suallarını cavablandırıb.

- Çox çətin səfər oyunu alındı. Əvvəlki turlarda da "Şamaxı" yüksək peşəkarlıq göstərirdi. Qarşılaşmanın ağır keçəcəyini bilirdik. Bu tip komandalarla oyunda önə çıxan əsas məsələ xarakter göstərməkdir. Hər iki komanda ilk hissədə ehtiyatlı oyun nümayiş etdirdi. İkinci yarıda isə meydanda daha istəkli oyun getdi. Vacib olan 3 xal idi ki, onu da qazandıq. Komandamı təbrik edirəm.

- İlk hissə ilə ikinci yarı arasında fərq nə idi?

- Birinci hissədə top itkilərimiz çox oldu. İkinci yarıda isə toplu oyunumuz daha yaxşı alındı. "Şamaxı" son dəqiqələrdə təhlükəli hücumlar edirdi. Bizim də əks-hücumlarımız oldu. Təəssüf ki, dəyərləndirə bilmədik.

- Oyun bitər-bitməz Ruan Renato ilə Aydın Bayramov arasında nə baş verdi?

- Açığı, görmədim. Stressli oyun idi. Belə epizodlar həm məşqlərdə, həm də oyunlarda baş verir. Normaldır. Sonradan bir-biri ilə qucaqlaşdılar. Hər şey qaydasındadır.

- "Zirə" psixoloji cəhətdən qarşıdakı oyunlara hazırdır?

- Gələcəklə bağlı danışmaq istəmirəm. Bilmirsən sabah nə olacaq. Düşünürəm ki, futbolçularım həm individual, həm də kollektiv şəkildə çox diqqətli olmalıdırlar. Hər rəqibin çempionatda özünəməxsus oyun taktikası, üstünlüyü var. Oyunçularımız növbəti matçlarda daha diqqətli olmalıdırlar.

Daşqın Əziz