"Zirə" klubunun baş məşqçisi Rəşad Sadıqov Misli Premyer Liqasının 28-ci turunda "Şamaxı"nı 3:0 hesabı ilə məğlub etdikləri matçı şərh edib.

Pressing.az xəbər verir ki, o, görüşdən sonra keçirilən mətbuat konfransında deyib:

- Milli fasilədən sonra ilk oyunumuz idi. Birinci hissənin ilk 5-10 dəqiqəsi bizim üçün fəal başladı. Amma sonra oyun biraz bizim üçün çətinləşdi. Demək olar ki, ilk hissədə istədiyimiz hücumları qura bilmirdik. Rəqib üzərində istədiyimiz üstünlüyü yarada bilmirdik. Şükürlər olsun ki, müdafiədə etibarlı idik, rəqibin əks-hücumlarının qarşısını alırdıq, hər hansı qol epizodu yaratmaqlarına icarə vermirdik. Amma ikinci hissədə komandam xeyli fəallaşdı və düşünürəm ki, çox vacib 3 xal qazandıq. Bilirdik ki, rəqib əzmkardır. Xüsusilə, son turlarda iddialı komandalara məğlub olmur, onlara qarşı yaxşı oyunu və nəticələr ilə seçilir. Biz oyuna yaxşı köklənmişdik. Birinci hissə ağır keçdi, amma ikinci hissədə, düşünürəm, hücumda daha aktiv idik.

- Fasilədə komandaya hansı tapşırıqları verdiniz ki, ikinci hissədə lazımlı nəticəni qazandınız?

- Fasilədə əsasən hücumda daha fəal olmaqla bağlı tapşırıqlar verdik. Çünki 0:0 hesabı və "Şamaxı"nın əks-hücumları, cinahdan asmalarından hər an fərqlənə bilməkləri təhlükəlidir. İkinci hissəyə dərhal fəal başladıq və uğurlu qollarımız oldu. İkinci qoldan sonra oyun bizim üçün daha rahat keçdi.

- Növbəti 2 turda "Qarabağ" və "Neftçi" ilə səfərdə gərgin oyunlar var...

- Həmin oyunları nəzərə alsaq, bu matçda 3 xal qazanmağımız olduqca önəmli idi. Qarşıdakı oyunlara köklənəcəyik. Çalışacağıq ki, həmin matçlardan xallarla ayrılaq.