Misli Premyer Liqasının 22-ci turunda keçirilən "Şamaxı" – "Sumqayıt" matçından (1:0) sonra meydan sahiblərinin qələbə qolunun müəllifi Brahim Konate Pressing.az-ın əməkdaşının da iştirak etdiyi brifinqdə jurnalistlərin suallarını cavablandırıb.

– Oyunla bağlı fikirlərini bölüşərdin...

– İki fərqli hissə oldu. İkinci yarıda oyunun gedişatını dəyişə bildik. Daha da irəli atıldıq və qol şansını dəyərləndirdik. Qalib gəldiyimizə görə çox xoşbəxtəm.

– Baş məşqçi sanki fasilədə komandanı oyandırdı. Ayxan Abbasov nə dedi ki, ikinci hissədə tam fərqli "Şamaxı" gördük?

– İlk olaraq birinci yarıda yaxşı oynamadığımızı bildirdi və haqlı idi. Qol şansları yaradacağımızı söyləməklə yanaşı, əsas məqsədimizin qol buraxmamaq olduğunu da xatırlatdı. Biz də buna uyğun davranaraq məqsədimizə çatdıq.

– Komandana qələbə gətirən qolun müəllifi oldun. Həmin anları necə xatırlayırsan?

– Matçdan öncəki analizlərdə rəqib komandanın qapıçısının topu tutan zaman səhvlər etdiyini görmüşdük. Ona görə də topun arxasıyca sona qədər qaçdım və şanslıyıq ki, bu epizodu qola çevirə bildik.

– "Şamaxı"nın oyunlarının sənin üzərində qurulduğunu deyə bilərik?

– Daha çox sərbəst oynamağa və komandama fayda verməyə çalışıram.

– Qələbəni bir neçə gün öncə dünyasını dəyişən yaşlı azarkeşinizə həsr etdiniz. Mərhumu necə xatırlayırsan?

– Xoşbəxtik ki, qələbə qazanaraq azarkeşlərimizi sevindirdik. Bugünlərdə bizim üçün çox dəyərli olan fanatımızı itirdik. Bugünkü qələbəni ona həsr edirik.

– Növbəti turda "Kəpəz" səfərinə yollanacaqsız. Bu, hər iki komanda üçün Premyer Liqada qalmaq uğrunda vacib qarşılaşma olacaq. Bu matçdan gözləntin nədir?

– Elitada hər oyun çətin və vacibdir. "Kəpəz"lə oyundan əlimizdən gələnin ən yaxşısını etməyə çalışacağıq ki, uğurlu nəticə ilə qayıdaq.

– Turnir cədvəlində rəqiblərlə xal fərqi qapanır. Buna görə komandada psixoloji gərginlik varmı?

– Dediyim kimi, hər oyun çox vacibdir. Üzərimizdə hər hansı bir təzyiq yoxdur. Hər oyun yaxşı çıxış edib, xal qazanmağa çalışırıq.

– Azərbaycan çempionatında növbəti mövsümdən komanda sayının artırılması və legioner limitinin ləğv edilməsi ilə bağlı qərarlar qəbul olundu. Bir futbolçu olaraq bu barədə nə deyə bilərsən?

– Legioner limitinin ləğvindən sonra bəlkə də azərbaycanlı futbolçular oynamaq üçün daha az şans qazanacaqlar. Lakin bu, AFFA-nın qərarıdır və bir söz deyə bilmərik.

Daşqın Əziz