Azərbaycan Premyer Liqasının 2-ci turu çərçivəsində bu gün keçirilən "Turan Tovuz" - "Sumqayıt" matçından (1:0) sonra meydan sahiblərinin baş məşqçisi Kurban Berdıyevin iştirakı ilə mətbuat konfransı keçirilib.

Pressing.az xəbər verir ki, o, əvvəlcə oyunla bağlı fikirlərini bölüşüb:

- İki fərqli hisssədən ibarət oyun oldu. İlk yarıda kifayət qədər aktiv oynadıq. Əlimizə düşən bütün fürsətləri reallaşdıra bilməsək də, oyundan zövq aldıq. İkinci yarıda hesabı qoruyub saxlamaq hissi futbolçulara daha çox təsir etdi. Və bu hissə oyuna öz təsirini göstərdi. İstənilən halda, "Sumqayıt"ın haqqını vermək lazımdır. Kifayət qədər keyfiyyətli futbolçulara malik komandadır. Görünən odur ki, keçirdiyimiz iki oyundan sonra üzərində düşünəcəyimiz məqamlar var.

Berdıyev daha sonra jurnalistlərin suallarını cavablandırıb.

- İkinci hissədə müdafiəyə çəkilmək taktiki gediş idi, ya rəqib sizi buna məcbur etdi?

- Xeyr, əslində, birinci hissədə futbolçularımız daha ürəkli oynayırdılar. Onlara aşılamaq lazımdır ki, həmişə üstün oynasınlar.

- İkinci hissədə eyni tempin olmaması fiziki güclə bağlı idi, yoxsa hesabı qorumaq üçün atılan addım idi?

- Sintetik ot örtüyündən təbiiyə keçmək fərqi var. Yenə də bildirmək istəyirəm ki, ikinci hissəyə ilk yarıya kökləndiyimiz kimi köklənə bilmədik. Rəqib də buna imkan vermirdi.

- Sizcə, hazırda malik olduğunuz heyət avrokuboklar üçün yetərlidir?

- Oyundan-oyuna keyfiyyətimizi artırmağa çalışırıq. Bizi qarşıda "Kəpəz"lə də çətin qarşılaşma gözləyir. Mövsümün sonunda nə olacaqsa, onu Allah bilər.

- Tovuzda ilk ev oyununuza çıxdız. Ab-hava necə idi?

- Azarkeşlərin performansına yaxşı mənada təəccübləndim. İlk turda "Neftçi" ilə səfər matçında da tribunaları doldurmuşdular. Onlara təşəkkür edirəm. Fanatlar anlayırdılar ki, dəstək göstərmək lazımdır və bunu artıqlaması ilə etdilər.

- Sizcə, komandaya daha bir hücumçu lazımdır?

- Mən Otto Cona inanıram. Görünən odur ki, bir qədər zaman lazımdır. Məşqlərdə də özünü yaxşı tərəfdən göstərir. Əminəm ki, onun oyununda yaxşı mənada dəyişiklik olacaq.

Daşqın Əziz/Tovuz