Misli Premyer Liqasının 29-cu turu çərçivəsində doğma meydanda "Neftçi" ilə qarşılaşan "Şamaxı"nın mərkəz müdafiəçisi Cəlal Hüseynov oyundan (0:2) sonra Pressing.az-ın Şamaxıya ezam olunmuş əməkdaşının suallarını cavablandırıb.

– Oyunla bağlı fikirlərini bölüşərdin...

– Çətin oyun oldu. "Neftçi"nin yaxşı komanda olduğunu bilirik. Matça yaxşı hazırlaşmışdıq. Qələbə qazanmaq istəyirdik. Əfsuslar olsun ki, yaratdığımız epizodları qola çevirə bilmədik. Bəlkə də ilk hissədə qol vursaydıq, gedişat tam başqa olardı.

– Komandanız qol vurmaq üçün əlindən gələni etdi, amma buna müəssər ola bilmədi. Qol vurmaq üçün nə çatmadı?

– Deyərdim ki, dəqiqlik çatmadı. Bu, futboldur. Elə olur ki, bir təhlükəli epizod yaradırsan, qola çevirirsən və matçın taleyini həll edirsən. Elə də olur ki, xeyli epizod yaratsan da, fərqlənə bilmirsən. Bu gün alınmadı...

– Növbəti turda "Sumqayıt" səfərinə yollanacaqsız...

– Hər oyuna ciddi yanaşırıq. İstəyirik ki, qalib gələrək turnir cədvəlindəki mövqeyimizi yaxşılaşdıraq. "Sumqayıt"la matça da qələbə qazanmaq üçün çıxacağıq.

Daşqın Əziz