Samir Abasov: "Növbəti mövsümdə başqa komanda olacağıq"

"Neftçi" klubunun baş məşqçisi Samir Abasov Misli Premyer Liqasının 35-ci turunda "Səbail"ə 3:0 hesabı ilə qalib gəldikləri oyunu şərh edib.

Pressing.az xəbər verir ki, o, matçdan sonra keçirilən mətbat konfransında komandaya gəldikdə "Səbail"ə qarşı ilk oyunu xatırlayıb:

"Səbail"lə birinci və indiki oyun tam fərqlidir. Onda bizim gəlişimiz futbolçulardakı əhval-ruhiyyəyə təsir etdi, oynamayanlar özlərini göstərmək istəyirdilər. Hər bir klubda baş verən prosesdir. İndi də çox rahatçılıq var və bunun fonunda hər şey alınır. Elə matçlar var idi ki, bundan da yaxşı oyunlar göstərmişdik. Məsələn, “Turan Tovuz”la oyunu xatırlayıram. Nə çatmadı? Elə həmin şeylər çatmırdı ki, istədiyimizdən xeyli uzaq qaldıq. Bunlar bizi düşünməyə məcbur edir. Bu çatışmazlıqlar üzərində işləyirik. Yeni mövsümdə başqa komanda olmağa məcburuq və, inşallah, olacağıq. Çatışmazlıqlardan danışmaq üçün gərək bütün oyunları analiz edim. Amma məncə, bunun üçün artıq gecdir".

Mütəxəssis deyib ki, kubok və çempionatdakı mübarizəni bölməmişdilər: "Anlayırıq ki, hansı klubdayıq, hər bir oyunun məsuliyyəti var və bilirik ki, hər bir oyuna görə cavab verməliyik. Əlimizdə sırf kuboku tutub, çempionata başqa motivasiya ilə çıxmırdıq. Vallah, belə bir şey yox idi. Sadəcə şanssızlıq oldu. Sonda şansımız kubokda idi. Ona başqa cür hazırlaşdıq. Futbolçular da onu artıq çıxış yolu kimi görmüşdülər. “Sabah”la görüşə də yaxşı başladıq, fürsətləri vursaydıq, bəlkə, finalda biz oynayardıq. Yenə də deyirəm, kubok və çempionatda ayrıseçlik etmədik, bundan sonra da etməyəcəyik. Əfsuslar olsun ki, heç bir yerdə alınmadı".