"Qarabağ"ın gənc hücumçusu Musa Qurbanlı Azərbaycan Premyer Liqasının 27-ci turu çərçivəsində bu gün səfərdə "Sumqayıt"ı 6:0 hesabıyla məğlub etdikləri oyundan sonra Pressing.az-ın əməkdaşının suallarını cavablandırıb.

- Oyunla bağlı fikirlərini bölüşərdin...

- Matç bizim üçün çox yaxşı alındı. Meydanda istədiyimiz oyunu sərgiləyə bildik. Nizam-intizamlı oynadıq. Bizə verilən tapşırıqları maksimum icra etdik. Şükürlər olsun ki, qələbə qazandıq.

- Qarşıdan Azərbaycan millisinin AÇ-2024-ün seçmə mərhələsində Avstriya və İsveç yığmalarıyla oyunları gəlir. Gözləntin nədir?

- Məqsədimiz xal və xallar qazanmaqdır. Bildiyiniz kimi, çox güclü rəqiblərlə qarşılaşacağıq. Əlimizdən gələni edəcəyik ki, maksimum nəticə göstərib, xalqımızı sevindirək.

- Martın 26-da Bakıda "Qarabağ"la "Qalatasaray" klubu arasında xeyriyyə matçı keçiriləcək və həmin vaxt millinin heyətində olacağından bu görüşdə iştirak edə bilməyəcəksən. Təəssüflənirsən?

- Əlbəttə. Çox istərdim ki, bu oyunda iştirak edim. Çünki "Qalatasaray" çox sevdiyim komandalardan biridir. Həmişə "Cim-bom"un oyunlarına baxmışam, azarkeşlik etmişəm. Təəssüf ki, bu matç milli fasiləyə təsadüf edəcək. Nə etmək olar, qismət... İnanıram ki, komandamız yaxşı mübarizə aparacaq. Bizi maraqlı qarşılaşma gözləyir.

- Bu gün Ramil Şeydayevin doğum günüdür. "Sumqayıt"la görüşdə qolları hərəyə iki dəfə fərqlənməklə Abdullah Zubir, Leandro Andrade və sən vurdun. Şeydayevə də şans yaratmaq istədinmi ki, o da ad günündə qol sevinci yaşasın?

- (Gülür) Təkcə doğum gününə görə yox, həmişə istəmişəm ki, Ramil qol vursun. O cümlədən də digər oyunçularımız. Bu, futboldur. Elə alınır ki, bir matçda Ramil fərqlənir, digərində başqa bir futbolçu.

Elsevər Muradzadə