"Bizim üçün çox vacib oyun idi. Çünki bu matçda qalib gələcəyimiz təqdirdə, çempionluğu bayram edəcəkdik. Lakin çalışırdıq ki, sırf buna köklənməyək və bu qarşılaşmada da hər zaman olduğu kimi maksimum nizam-intizamı saxlayaq, meydanda hər şeyi düzgün edək. Qələbə qazandıq, çempion olduq. Buna görə çox sevincliyik".

Bu sözləri Pressing.az-a açıqlamasında "Qarabağ"ın hücumçusu Musa Qurbanlı deyib. 21 yaşlı forvard Azərbaycan Premyer Liqasının 34-cü turunda səfərdə "Səbail"i 3:0 hesabıyla məğlub edərək 2022/23 mövsümünün çempionluğunu rəsmiləşdirdikləri matçdan sonra fikirlərini bölüşüb.

O, son matçlarda qol vura bilməməsinə də toxunub:

"Meydanda əlimdən gələnin daha artığını etməyə çalışıram. Əvvəl qolları sıralayırdım, amma indi bu, mənə müəssər olmursa, Allahın işidir. Mən yenə də öz oyunumu oynayır, meydanda maksimum üzərimə düşəni etməyə çalışıram. Bundan sonra da əlimdən gələni edib, komandama fayda vermək istəyirəm".

Adı Avstriyanın "Zalsburq" klubu ilə hallanan Qurbanlı gələcək karyerası haqda isə bunları deyib:

"Hələ ki bu barədə düşünmürəm. Mövsüm bitdikdən sonra məşqçilərlə danışıb, məsləhətləşdikdən sonra qərar verəcəyəm. Hazırda bütün diqqətimi "Qarabağ"a yönəltmişəm".

Elsevər Muradzadə