Azərbaycan Premyer Liqasının 18-ci turunun ilk oyununda səfərdə "Neftçi"yə 3 cavabsız qolla məğlub olan "Şamaxı"nın baş məşqçisi Cavid Hüseynov qarşılaşma və komandanın ilk dövrədəki çıxışı haqda fikirlərini bölüşüb.

Matçdan sonra Pressing.az-a danışan gənc mütəxəssis "Neftçi"yə keyfiyyət və təcrübə baxımından da məğlub olduqlarını söyləyib:

"Bu gün "Neftçi"yə məğlub olmaq istəmirdik. Lakin keyfiyyət fərqi önə çıxdı və nəticəsini də gördük. Görünən odur ki, təkcə oyun planı yox, birəbir mübarizə, təcrübə də önəmlidir. İlk dövrədəki çıxışımızı normal qiymətləndirirəm. Xal və xallar qazanaraq sonuncu pillədən qurtulmağı bacardıq. Bilirik ki, ikinci dövrə bizim üçün çox çətin olacaq. Çünki Premyer Liqa klubları qış toplanışı dövründə güclənəcəklər. Bizim də güclənməyimiz çox vacibdir. Bu, hansı dərəcədə olacaq, bilmirik, lakin əlimizdən gələni etməyə çalışacağıq".

Hüseynov komandanın transfer siyasəti haqda da fikirlərini bölüşüb:

"Hazırda bütün mövqelərdə yeni futbolçulara ehtiyacımız var. Elə mövqe var ki, orada hətta iki futbolçuya ehtiyac duyuruq. Bunu həyata keçirməliyik ki, rəqabət yarada bilək. Bu da olmadığı təqdirdə inkişaf çox zəif gedəcək. Amma bir mövqedə iki keyfiyyətli futbolçu olanda, həm inkişafın şahidi olursan, həm də rəqabət yaranır. Təbii ki, indiki durumda bütün mövqelərə futbolçu almağımız inandırıcı deyil. Klubun durumuna nəzər yetirdikdə, bununla bağlı konkret bir söz demək olmaz. Amma qışda maksimum dərəcədə çalışacağıq ki, bizə lazım olan mövqelərə futbolçular alaq".

Elsevər Muradzadə