Misli Premyer Liqasının XVI turunun "Zirə" - "Turan Tovuz" matçından (2:1) sonra meydan sahibi komandanın baş məşqçisi Rəşad Sadıqov fikirlərini bildirib.

Pressing.az xəbər verir ki, "CBC Sport"a danışan mütəxəssis görüşlə bağlı bunları söyləyib:

"Turan Tovuz" uzun fasilədən sonra elitaya qayıdıb. Onlar çempionata rəng qatıblar. Təhlükəli əks-hücumlara çıxırlar. Səbirli, təmkinli oynadıq. Rəqibin qapıçısının çoxlu qurtarışları oldu. Futbolçularımın çıxışından razıyam. Onları təbrik edirəm.

Hər zaman qoldan sonra futbolçularda diqqət itkisi olur. İkinci qoldan sonra bəlkə də, düşündülər ki, oyun bitdi. Lakin rəqib dərhal bizi cəzalandırdı. Bundan dərs çıxarmalı və gələcək oyunlarda daha diqqətli olmalıyıq".

Sadıqov ölkə kubokunun 1/4 finalında "Neftçi"yə qarşı keçirəcəkləri oyundan da gözləntilərini bölüşdü:

"Kubokda "Neftçi"yə qarşı oyunumuz var. Bilirik ki, onlar hər zaman iddialı və favoritdir. Son turda "Qarabağ"a məğlub olublar və bizlə böyük motivasiya ilə oynayacaqlar. Bizi gərgin oyun gözləyir. Əlimizdən gələni edəcəyik".