Ziyabil Məmmədov: "Turan Tovuz"la oyunda səviyyə fərqi öz sözünü dedi" - MÜSAHİBƏ

"Göygöl" Azərbaycan Kubokunun ikinci təsnifat mərhələsində bu gün "Turan Tovuz"a 1:5 hesabıyla məğlub olaraq turnirdə mübarizəni dayandırıb.

Qonaqların kapitanı Ziyabil Məmmədov matçdan sonra Pressing.az-ın əməkdaşının suallarını cavablandırıb.

- İlk olaraq oyunla bağlı fikirlərini bölüşərdin...

- "Turan Tovuz" güclü komandadır. Bizdən üstün olduqlarını bilirdik. Rəqib həm də elitada çıxış edən kollektiv idi. Biz də bu görüşə həvəslə çıxmışdıq. Düzdür, nəticə ürəkaçan olmasa da, komanda yoldaşlarım meydanda əllərindən gələni etdilər.

- "Göygöl" güclü rəqibinə qarşı çox cəsarətli oynadı. Səncə, komandanız meydanda maksimumunu etdi? Oyununuzdan razı qaldın?

- Bəli, oyunumuzdan razı qaldım. Səviyyə fərqi öz sözünü dedi. Komandamız meydanda yaxşı oyun göstərmək, nəticə əldə etmək üçün çalışdı.

- Vaxtilə "Turan Tovuz"un heyətində bu meydanda top qovmusan. Bu gün buraya rəqib kimi gəlmək necə hiss idi?

- Tovuz şəhər stadionu mənə yad deyil. Əlbəttə, xoş hisslər idi. Düzdür, əsas olan nəticədir, lakin buna nail ola bilməsək də, komanda meydanda "vuruşdu".

- İkinci Liqada hədəfləriniz nədir?

- Açığı, turnir başlamazdan qabaq elə bir hədəfimiz yox idi. Lakin hazırda komanda şəklində yaxşı formadayıq. İnşallah, ikinci, ya üçüncü yer uğrunda mübarizə aparacağıq.

Elsevər Muradzadə