"Göygöl" Azərbaycan Kubokunun II təsnifat mərhələsində "Turan Tovuz"a 1:5 hesabı ilə məğlub olaraq turnirdə mübarizəni dayandırıb.

II Liqa təmsilçisinin baş məşqçisi Araz Mansurov matçdan sonra Pressing.az saytının əməkdaşının suallarını cavablandırıb:

- Bizim üçün təcrübə qazanmaq baxımından yaxşı oyun oldu."Turan Tovuz"un yaxşı heyəti var. Oyunun belə olacağını gözləyirdik. Uşaqlarla matçdan öncə danışdıq ki, əlimizdən gələnin ən yaxşısını edək. Məğlub olmağımıza baxmayaraq, yaxşı oynadıq.

- Bu matçın sizin üçün hansı faydaları oldu?

- Təcrübə qazandıq. Zəif olduğumuz yerləri bilirdik. Həmin yerlərdən də qollar buraxdıq.

- II Liqada hədəfləriniz nədir?

- Liqa bu il yaranıb. Əsas məqsədimiz liqada qalmaqdır. Daha sonra yuxarı pillələr və çempionluq uğrunda oynamaq istəyərik. Hazırda ilk 6-lıqdayıq. I dövrəni normal yerdə başa vurmağa çalışırıq. II dövrədə yuxarı pillələr üçün oynayacağıq.

- Fasilədə heyəti gücləndirmək istiqamətində rəhbərliklə danışığınız olub?

- Hər komanda kimi biz də çempionluq üçün oynayırıq. Liderlə xal fərqimiz elə də çox deyil. Bu, futboldur, bilmək olmaz. Lider "Baku Sportinq" xal itirə bilər. Fasilədən sonra çatışmayan mövqeləri gücləndirsək, çempionluğa oynaya bilərik.

- Azarkeşlərdən istədiyinizi ala bilirsiz?

- Oyunlarımız həftəiçinə düşür deyə çox azarkeş gələ bilmir. Həftəsonu olsa, fərqli olar. Futbolun gözəlliyi azarkeşlərdir. Onlar olanda daha da yaxşı oynayırsan.

- Stadionunuzun işıqlandırma sistemi var?

- Bəli, var. Normaldır. Yəqin ki, rəhbərlik AFFA ilə danışıb axşam saatlarında da oyun keçirməyimizi təmin edə bilər. Hələ ki, müraciət etməmişik. Biz də istəyərik ki, axşam saatlarında oynayaq. İş vaxtından sonra olsa, azarkeşlər də gələr.

Elsəvər Muradzadə