Şahin Diniyev: "Komanda xarakter göstərdi"

"Səbail" Azərbaycan Premyer Liqasının 12-ci turunda doğma meydanda "Turan Tovuz"u 2:1 hesabı ilə məğlub edib.

Pressing.az xəbər verir ki, "dənizçilər"in baş məşqçisi Şahin Diniyev matçdan sonra keçirilən mətbuat konfransında jurnalistlərin suallarını cavablandırıb:

- Çox gərgin, dramatik oyun idi. Komanda xarakter göstərdi. Nəticə ikinci plandadır. Əsas futbolçular sağlam olsun. İlk yarıda oyun "Turan Tovuz"un, ikinci hissə bizim tərəfimizdə idi. İlk yarıda futbolçular panikadaydı, ritmdən düşmüşdülər. Fasilədə sakit formada danışdıq. Bunu bacardıq. Beyin sakitləşəndən sonra bədən istədiyini edə bilir. Çox yaxşı oynadıq fasilədən sonra. "Turan Tovuz" da yaxşı oynadı. Gözləməzdim ki, ilk yarıda belə aqressiv olarlar. Onlara uğurlar arzulayıram. Komandama təşəkkür edirəm ki, döyüşdülər, özlərində güc tapdılar. Bir çox qol epizodlarımız da var idi. Layiqli qələbə qazandıq, təsadüfən yox. 12-ci turdur, hər oyunda qol vurmağa çalışırıq. Hücumda çoxluq varsa, müdafiədə azlıqda qalmağa məhkumuq. Çox qol buraxmağımız da bununla bağlıdır.

- Bir oyunda üç futbolçunu itirmək karyeranızda olub?

- Həm də əvəzetmələrimiz bitmişdi. Hər biri də əsas oyunçularımızdır. Müdafiədə itkilərimiz çoxdur. Gözləyirik ki, ikinci dövrə tez bitsin və buna əncam çəkək. Limitə düşənləri itirmək olduqca çətindir. Karyeramda belə gərgin, xarakterli, itkili, dramatik oyun olmayıb. Yadıma gəlmir belə oyun.

- Sizcə, Səlahət Ağayevə sarı, yoxsa qırmızı vərəqə verilməli idi?

- Hakim VAR-a baxanda mən də baxdım, top dizinə dəydi, sonra əlinə. Başına dəyib, əlinə dəyirsə, sarıdır. Dərhal əlinə dəysəydi, qırmızı vərəqə olacaqdı.

- Ayxan Abbasov hakimlikdən narazı qalıb. Sizcə, hakimlik hansı səviyyədə idi?

- Bütün həmkarlarımın fikirlərinə hörmətlə yanaşıram. Belə məğlubiyyət üzücüdür. Hərənin bir baxışı var. Ona da hörmətlə yanaşıram.