"Paltardəyişmə otağında futbolçularıma bildirdim ki, hər iki hissənin ilk dəqiqələrini uduzduq. Amma ümumi götürdükdə xarakter göstərdik və oyunçuların mübarizələrindən razı qaldım".

Pressing.az xəbər verir ki, bu sözləri "Turan Tovuz" klubunun baş məşqçisi Kurban Berdıyev Misli Premyer Liqasının 6-cı turunda bu gün "Sabah"la keçirilən səfər matçından sonra mətbuat konfransında deyib.

Türkmənistanlı mütəxəssis 2:2 hesabı ilə başa çatan matçı belə şərh edib: "Azarkeşlərimizə təşəkkür edirəm. Hər yerdə onların dəstəyini hiss edirik. İkinci hissədə bəzi futbolçuların yanlış mövqeyi rəqibə bundan istifadə etməyə imkan verdi. “Sabah” bu işi yaxşı bacarır. Bir daha deyirəm ki, göstərdikləri xarakterə görə komandama minnətdaram".

Matçın sonlarında "Turan Tovuz" 3-cü qolu vursa da, baş hakim Əliyar Ağayev qolu saymayıb. K.Berdıyev bu haqda da danışıb: "Yan xətt hakimi topun meydanı tərk etdiyini söylədi. Amma onun bunu necə müəyyənləşdirdiyi sual olaraq qalır. Artıq qərar verilib".