"Rəqib İkinci Liqa komandası olmasına baxmayaraq..." - Vurğun Hüseynov

"Kəpəz" ötən gün Azərbaycan Kubokunun ikinci təsnifat mərhələsində doğma meydanda "Baku Sportinq"i 2:0 hesabıyla məğlub edərək növbəti mərhələyə vəsiqə qazanıb.

"Sarı-göylər"in təcrübəli futbolçusu Vurğun Hüseynov matçdan sonra Pressing.az-ın əməkdaşının suallarını cavablandırıb.

- "Kəpəz"ə gəlişindən sonra ilk dəfə start heyətdə yer aldın və 120 dəqiqə meydanda oldun. Özünü necə hiss edirsən?

- Özümü yaxşı hiss edirəm. Uzun fasilədən sonra mənim üçün geriqayıdış oldu. Düşünürəm ki, pis olmadı. Yüzdə yüz hazır olmasam da, təcrübəm hesabına bəzi epizodları idarə edə bildim. Rəqib İkinci Liqa komandası olmasına baxmayaraq, bizə qarşı yaxşı müqavimət göstərdilər. Buna görə onları təbrik edirəm.

- Rəqibdən söz düşmüşkən, "Baku Sportinq" "dişinizə" görə idi...

- Elədir. Lakin boşalmaq olmaz. Qarşıdan "Sabah"la çempionat oyunu gəlir və komanda olaraq bu matça köklənmişik. "Baku Sportinq"lə oyun komanda üzvlərinin özlərini yaxşı tərəfdən göstərməsi üçün əla fürsət idi ki, "Sabah"la matçda əsas heyətdə oynamaq şansı qazansınlar.

- Səncə, komandanız "Sabah"la oyunadək hazır ola biləcək?

- Demək olar ki, bu görüşdə əsas heyət üzvlərinin çoxu oynamadı. "Sabah"la oyuna üç gün var. Məncə, bu görüşə tam hazır olacağıq.

- Ötən tur "Səbail"dən bir xal qoparsanız da, "Qəbələ" böyükhesablı qələbə qazandı. Bu, "kefinizə soğan doğramadı" ki?

- Biz rəqiblərin oyunlarına baxmırıq. Önümüzə baxırıq. Qarşıda oyunlar çoxdur. Turnir cədvəlində bizdən olan irəlidə komandalar həm heyət, həm büdcə, həm də şərait baxımından "Kəpəz"dən üstündürlər. Lakin bütün bunlara baxmayaraq, çalışacağıq ki, yaxşı nəticələr qazanaq.

Elsevər Muradzadə