Tərlan Əhmədovdan qələbə şərhi

"Həftəlik məşq mərhələsində bu oyunun çətin keçəcəyini futbolçulara başa salırdım. Turnir cədvəlində iki qonşu komanda qarşılaşırdı, rəqib bizdən çox da uzaqlaşmamalı idi. 4 ildən sonra ikinci ev oyununda Gəncə azarkeşlərinə qələbə bəxş etmək istəyirdik".

Pressing.az xəbər verir ki, bu sözləri "Kəpəz"in baş məşqçisi Tərlan Əhmədov Misli Premyer Liqasının 12-ci turunda evdə "Səbail"ə 3:0 hesabı ilə qalib gəldikləri matçdan sonra keçirilən mətbuat konfransında deyib.

O, oyunun ilk dəqiqələrindən futbolçuların özündə həyəcan, təzyiq hiss olunduğunu vurğulayıb: "Oyunumuz alınmırdı. Amma getdikcə çalışdığımız qədər rəqibi əks-hücumda tutub oyunu öz tərəfimizə çevirməyə səy göstərirdik. Bu da tədricən öz bəhrəsini verdi. Düzdü, səhvlərimiz həddindən artıq çoxdur. Qələbədən dolayı futbolçularımı təbrik edirəm. Azarkeşlərə sona qədər bizə dəstək olduqlarına görə təşəkkür edirəm. Hər halda bu gün fanatların bizə dəstəyi ikinci stimul oldu. Heyətimizdəki kasadlığa baxmayaraq komanda yaxşı mübarizə aparır. İstədiyim tam formaya nail ola bilməmişik. Bunun üçün zaman lazımdır. Ümumillikdə komanda istəklidir. Mübarizə aparır, yaxşı oyun nümayiş etdirməyə çalışır və bu məni sevindirir".