"Maraqlı bir oyun izlədik. Bu görüşə qədər evdə 1:2 hesabı ilə məğlub olmuşduq. Bu da istər-istəməz komandanın üzərində təzyiq yaradırdı. İlk dəqiqələrdən komandada həyəcan, özünə inamsızlıq hiss olunurdu".

Pressing.az xəbər verir ki, bu sözləri "Kəpəz"in baş məşqçisi Tərlan Əhmədov Azərbaycan kubokunun 1/4 finalında "Turan Tovuz"la heç-heçə edərək mübarizəni dayandırdıqları cavab oyunundan (2:2, ilk oyun - 1:2) sonra təşkil olunan mətbuat konfransında deyib. O, baş hakim Rəvan Həmzəzadənin oyunun sonlarına yaxın yaşanan epizodda "Turan Tovuz"un qapısına penalti təyin etməməsindən narazı qaldığını bildirib:

"İki top buraxaraq məğlub duruma düşsək də, hesabı bərabərləşdirə bildik. Hətta qalib də gələ bilərdik. Oyun hər iki komanda adına maraq doğururdu. Hər iki kollektiv gələcək üçün böyük ümidlər verir. Şansımız bərabər idi. Oyunun sonlarına yaxın verilməyən penalti epizoduna da baxdıq. O epizodda 100 faiz penalti var idi. Necə hakim onu verməyə bilərdi sualı maraq doğurur. Artıq hər şey keçmişdə qaldı. Bizim üçün kubok bitmiş sayılır. "Zirə" ilə çempionat oyununa hazırlaşmalıyıq. Komandama bu oyuna görə təşəkkür edirəm".