Premyer Liqamızın 5-ci turu "Neftçi" üçün əlamətdar olub.

Belə ki, mövsüm başlayandan bəri qələbə üzünə həsrət qalan "ağ-qaralar", nəhayət, bu tilsimi qıra bilib. Paytaxt təmsilçisi səfərdə "Sumqayıt"a 2:0 hesabıyla qalib gələrək aktivinə 3 xal yazdırıb.

Bəs görəsən, "Neftçi" bunun davamını gətirə biləcəkmi? Ümumiyyətlə, baş məşqçi Samir Abasova vaxt verilməlidirmi?

Pressing.az-ın suallarını cavablandıran "Neftçi"nin sabiq idman direktoru, futbol eksperti Ceyhun Sultanov Bakı klubunun heyətində keyfiyyətli futbolçular olduğunu və Abasova zaman verilməsinin tərəfdarı olduğunu qeyd edib:

"Bir oyuna görə indidən nəsə demək olmur. Lakin komandadakı futbolçuların keyfiyyəti onu deməyə əsas verir ki, uğurlu nəticələr olacaq. Düzdür, mövsümə uğursuz start verdilər. Lakin ümidvaram ki, "Neftçi" yavaş-yavaş istənilən nəticəni verəcək. Çünki bu komanda aşağı yerlərdə olmamalıdır. Heyətdəki futbolçuların potensialı buna imkan verir. Samir Abasova da uğurlar arzu edirəm. "Neftçi"ni bir dəfə çempion edibsə, bunu təkrarlamaq üçün də zamana ehtiyacı var. Bəlkə çoxu düşünəcək ki, nə qədər vaxt vermək olar?! Lakin məncə, Abasov bunu bacaracaq. Futbolçuların potensialına əsasən bunu deyə bilərəm".

Qeyd edək ki, "Neftçi" hazırda 6 xalla turnir cəvdəlinin 8-ci pilləsində qərarlaşıb.

Daşqın Əziz