"Neftçi" uzun müddətdir ki, futbol ictimaiyyətində müzakirə mövzusu, sosial şəbəkələrdə isə məzkəhə hədəfidir. Ələlxüsus cari mövsüm "Qarabağ"la keçirilən oyunların nəticələri diqqət mərkəzindədir. Bakı klubu Azərbaycan Kuboku da daxil, altı dueldə bir dəfə də qalib gələ bilməyib. Qələbə bir yana, "Neftçi" bütün matçlarda məğlub olub. Dörd qarşılaşmada isə darmadağına məruz qalıb. Bir sözlə, "xalqın komandası" beş oyundur ki, "köhlən atlar"a "bata bilmir". Bir az da bədiiləşdirsək, "ağ-qaralar" Ağdam təmsilçisinin "yanından belə keçə bilmir".

Bugünkü hesab isə daha katastrofik oldu. "Neftçi" qapısında nə az, nə çox - beş cavabsız qol gördü. Situasiya elə idi ki, qarşılaşmanın baş hakimi İnqilab Məmmədovun da bakılılara rəhmi gəldi. Referi 90 dəqiqənin tamamında final fitini səsləndirdi.

...Əslində, çoxu "Neftçi"nin bugünkü matçda qələbə qazanacağını, oyundan ən azı bir xalla ayrılacağını güman edirdi. Bunu deməyə də əsas yaranmışdı. Çünki çempionluğu vaxtından əvvəl təmin edən "Qarabağ"ın bu görüşdə büdrəyəcəyi gözlənilirdi. Lakin bütün proqnozlar alt-üst oldu. Son üç turdur ki, qələbə üzünə həsrət qalan ağdamlıların bu matçda "ayağı açılmışdı". Qurban Qurbanovun komandası sanki qarşılaşmaya son oyun kimi çıxmışdı. "Qarabağ"ın futbolçularında elə aqressiya vardı ki...

Belə demək mümkünsə, Ağdam klubu sanki bu gün "flaqman"ın qüruru ilə oynayırdı...

"Neftçi"nin bugünkü rəzil durumu haqda uzun-uzadı yazmaq, dərinliklərə enmək olar. Lakin nə qədər "günahkar ovu"na çıxılsa da, düzələn bir şey yoxdur ki yoxdur. Azarkeşləri komandadan küsdürən, onları mövcud vəziyyətdən iyrəndirən klub rəhbərliyi papağını təkrar-təkrar qarşısına qoyub düşünməlidir.

Pressing.az