"Neftçi"yə yeni baş məşqçi gəlsə də, komanda mövsümə uğursuz başladı. Arxada qalan 3 turda "ağ qaralar" cəmi 2 xal toplayıb. Klubun bu nəticələri azarkeşlər və futbol ictimaiyyəti tərəfindən narazılıqla qarşılanıb. Veteran futbolçular arasında da Bakı təmsilçisini və rəhbərliyi qınayanlar az deyil. Onlardan biri də "Neftçi"nin sabiq üzvü Paşa Əliyevdir.

Veteran futbolçunun Pressing.az-a açıqlaması belə oldu:

"Azərbaycan futbolunda həll olunmayan iki problem var - millimizin və "Neftçi"nin inkişaf edə bilməməsi. Bu barədə nə qədər danışsaq da, sonu yoxdur və müsbətə doğru dəyişiklik gözə dəymir. "Neftçi"də vəziyyət kor bağırsaq kimi uzandıqca, uzanır. Hünər lazımdır ki, onu birdəfəlik kəsəsən. Demişəm, yenə deyirəm, son nəfəsimə qədər də deyəcəm, "Neftçi"yə futbolu bilən insanlar rəhbərlik etməlidir, avantürayla məşğul olanlar yox. Baxın "Qarabağ"a, "Zirə"yə, hər iki klubda düzgün qurulan işin nəticəsi görünür. Çünki klubların başında futbolu bilən şəxslər əyləşib, komandaya isə işinin peşəkarı olan yerli mütəxəssislərimiz rəhbərlik edirlər. Neçə illərdir "ağ-qaralar"camiəsinə futbolumuzu, yerli mentaliteti bilməyən səriştəsiz əcnəbilər gətirilir. Həqiqətdə isə böyüm həcmdə pullar xərclənir və ya yeyilir. Bu, aksiomadır ki, yeyinti olmayan yerdə inkişaf, nəticələr olur. Özbaşınalıq, səriştəsizlik, qanunsuzluq, külli miqdarda pul yeyintisi olan yerlərdə isə hərtərəfli tənəzzül başlayır. Ölkənin ən köklü klubunda illərdi sərgilədiyi nəticələri, o cümlədən də yeni mövsümün arxada qalan 3 turundakı göstəricisinə söz tapmaq olmur. Buna rəzalət, biabırçılıqdan başqa nəsə demək olmur".

Paşa Əliyev istər "Neftçi"də, istərsə də futbolumuzda əcnəbi məşqçilər açıq qapı elan edildikcə, heç bir inkişafa nail olunmayacağını da vurğuladı:

"Gəlin, ölkə futbolunda klublarımızın uğurlarına baxaq. "Neftçi" Böyükağa Hacıyevin rəhbərliyi altlnda Avropa Liqasının qrupuna düşdü. "Qarabağ" 14 ildi avrokubokların qruplarında oynayır. Baş məşqçisi yerli. Rəşad Sadıqovlu "Zirə" tarix yazır. Gördüyünüz kimi yerli məşqçilərimiz heç də mutulardan, bojoviçlərdən əskik, savadsız, zəif deyillər. Sadəcə inanım şans vermək lazımdı. Çoxları deyə bilər ki, Roman Qriqorçukla da "Qəbələ" iki dəfə avrokubokların qrupunda oynayıb. Bəli, oynayıb, danmıram. Amma unutmayaq ki, bu yalnız ukraynalın yox, həm də klub rəhbərliyin düzgün idarəçiliyi, seçdiyi düzgün strateya və xərclədiyi milyonların sayəsində idi. Sözüm o ki, bizdə Qriqorçuku əvəz edən onlarla mütəxəssislərimiz var. Onlara da inanıb şans tanınsa, əcnəbi məşqçilərə tökülən pulların yarısı qədər vəsait ayrılsa, əmin olun ki, arzuolunan nəticələr görəcəyik. Amma görünən odur ki, yerli kadrlarımıza qapı göstərib, əcnəbilərin ayaqları altına xalça salırıq".

ABDULLA İSMAYILOĞLU, Pressing.az üçün