Arsen Ağcabəyov: "... Bundan istifadə edib, "Qarabağ"ı keçə bilərik" – AÇIQLAMA

Misli Premyer Liqasının 18-ci turu çərçivəsində ötən gün keçirilən "Kəpəz" – "Şamaxı" oyunundan (0:2) sonra qonaq komandanın kapitanı Arsen Ağcabəyov Pressing.az-ın Yevlax şəhər stadionuna ezam olunmuş əməkdaşının suallarını cavablandırıb.

– Oyunla bağlı fikirlərini bölüşərdin...

– Ötən turda "Qəbələ"yə böyük hesabla məğlub olmuşduq. Bu qarşılaşma üçün toparlanmalı idik. Şükürlər olsun ki, bunu bacardıq. Xarakter göstərib, 3 xal qazandıq. İrəli baxacağıq.

– "Qəbələ"yə 0:4 hesablı məğlubiyyətdən sonra bu matça konsentrasiya olmaq çətin deyildi ki? Nəzərə alsaq ki, "Kəpəz" son turda "Qarabağ"a qalib gəlmişdi...

– Əlbəttə, "Qarabağ" üzərində qələbəsindən sonra "Kəpəz"lə oyunun çox çətin olacağını bilirdik. Lakin danışdıq, komanda olaraq yumruğumuzu bir yerə vurduq və yekunda 3 xala sevindik.

– Bir neçə gün sonra Azərbaycan Kubokunda "Qarabağ"la qarşılaşacaqsız. Bu matçdan gözləntin nədir?

– Kubok oyunu irəli getmək üçün bir şansdır. Bilirik ki, "Qarabağ"ın qarşıda Çempionlar Liqasında oyunları var. Bundan istifadə edə bilsək, mərhələ adlamaq olar.

Daşqın Əziz
Foto: Peşəkar Futbol Liqası