Varam Azərbaycan futbolundakı hərəkətliliyə, dinamikaya.

Meydanda yox ha, burdan başqa istənilən sferada. Məsələn, idarəetmədə, yüksək təşkilatçılıqla keçirilən tədbirlərdə və s. Futbolumuzun yuxarı başda oturanları bu camiədə olan təbəqələrin mövqeyini, fikirlərini nəzərə almadan ürəkləri istəyən kadrları kresloya əyləşdirir. "Yuxarılar"ın aşağı zümrə olaraq gördüyü mətbuatın fikirlərinə önəm verilməməsi də artıq normal hal sayılır. Yazan yazır, pozan pozur. Bir neçə günə də məsələ qaynarlıqdan çıxır, şablona çevrilir. Fikirlər də qüvvədən düşür. Və ya vardır hər vəzifəlinin bir "kruq"u. Nə isə, bu mövzuda dərinliyə düşdükcə daha da iyrənirsən, barmaqlarına əziyyət verib yazmaq belə istəmirsən.

Hələ yüksək təşkilatçılıqla keçirilən tədbirlərdən danışım. Elə mərasimlər təşkil olunur ki, gəl bax, ağzın açıq qalsın. Bakının ən bərkgedən hotelləri, bahalı menyular, model kimi xanımların skripkada ifasında klassik Avropa musiqiləri, hamının üzündə təbəssüm. Bəzən belə tədbirlərə sadə geyimdə gəldiyinin fərqinə varanda utanırsan. Fikirləşirsən, kaş mən də klassik geyinə, hələ kəpənək də taxardım. Axı elitar məclisdir...

Ok, bəs futbol? Meydanlardan kənarda min cür "hoqqa verəsən", amma 90 dəqiqəlik oyuna gələndə xəcalət təri tökəsən. Deyilmir ki, tədbirlər keçirilməsin. Amma bu elitarlığa ehtiyac yoxdur, hörmətli futbol başbilənlərimiz. Hansı gününüzə Avropanın qabaqcıl futbol ölkələri ilə ayaqlaşırsız? Furşet yox ha, belə futbol meynunuzda nəyiniz var?

Bəlkə heç İspaniya, Almaniya, Fransada belə canfəşanlıq edilmir tədbirlərdə. Çünki onlar üçün prioritet bahalı hotellərdə furşet yemək, yığılıb şəkil çəkdirmək yox, meydanda nəticə verməkdir.

Nə isə, bu gün əsas müzakirə mövzusu Premyer Liqada komanda sayının artırılması, çempionatın yeni formatının necə olacağı və ələlxüsus legionet limitinin ləğvidir. Amma necə deyərlər, bunu da yazmasam, olmazdı...

Pressing.az