Dağdakı gəlib bağdakını qovarsa...

Ötən gün Azərbaycan kubokunda yarımfinal mərhələsinin cavab oyunları keçirildi.

"Neftçi" Masazırda "Sabah" səddini aşa bilmədi və kubok qazanmaq xəyallarını puç etdi.

Hər şey bir yana, diqqətləri çəkən məqamlardan biri də qarşılaşmadan sonra Lalə Məmmədovanın ifasında "Bu şəhər ikimizə dar" mahnısının Masazırda (!) səslənəndirilməsi oldu. Masazırda ha...

"Sabah" azarkeşlərinə nə demək olar? Heç nə. Fanat zəfərin dadını çıxarır, sevincini ifadə edir. Bəs o mahnını qoyaraq "Neftçi"yə söz atan "Sabah" nə düşünür?

Masazır təmsilçisi (!) "ağ-qaralar"a deyir ki, Bakıda ikimizdən biri artıqdır. Hansı ki Bakının qədim sakini, "qoca"sı elə dünən qəsəbədə uğursuzluğa düçar olan "Neftçi"dir. Günah "Sabah"da yox, elə "Neftçi"nin özündədir. "Bakı ikimizə dardır" demək üçün bu özgüvəni, eqonu "bayquşlar"a məhz "Neftçi" verib.

Düzdür, futbol belə atmacalarla daha da rəngarəng, maraqlı olur. Amma ortada bir nüans da var. "Sabah" Masazır qəsəbəsini təmsil edə-edə hazırda Bakının ən böyük, tarixi, kökü olan komandasına qarşı belə bir atmaca atır. Qəribədir.

Necə deyərlər, dağdan gələn bağdakını qovur. Normal deyil? Bağdakı "diş" göstərə bilmirsə, dağdan gələn neyləməlidir?..

Pressing.az