Ramin Nəsirli: "Əsas hədəfim özümü göstərib, Avropada çıxış etməkdir" – MÜSAHİBƏ

"Neftçi"nin icarə əsasında Latviyanın "Dauqavpils" klubuna keçən 20 yaşlı yarımmüdafiəçisi Ramin Nəsirli Pressing.az-a müsahibə verib.

- "Neftçi" ilə müqavilənin müddəti nə vaxt bitir?

- Hazırda "Neftçi"nin oyunçusuyam və komandamla müqaviləm davam edir.

- Necə oldu ki, "Dauqavplis"ə keçdin? Səninlə birgə Nazim Həsənzadə də eyni kluba keçib...

- Təklif gəldi və bunu dəyərləndirdim. "Neftçi" rəhbərliyinə və məşqçilərimə mənə verdikləri dəstəyə görə təşəkkürümü bildirirəm.

- Ötən il Asim Əlizadə də həmin klubda oynayıb. Onunla maraqlanmışdın? Maraqlanmışdınsa, hansı müsbət və mənfi cəhətləri demişdi sənə?

- Bəli, Nazimlə eyni komandadayıq. Elə "Rfş" klubu ilə yoldaşlıq matçında da start heyətində meydana çıxaraq, 70 dəqiqə oynamışıq. Mənfi və müsbət məqamlar deyəndə, burada ilk növbədə ölkəmizi layiqli şəkildə təmsil etmək istəyirəm. Hər zaman bayrağımızın yüksəklərdə dalğalanmasını istəyirəm.

- Hədəfin nədir? Orada qalıb, möhkəmlənmək istəyirsən, yoxsa özünü yaxşı tərəfdən göstərib, "Neftçi" ilə yayda avrokuboklarda oynamaq istəyirsən?

- Əsas hədəfim burada yaxşı çıxış edərək, komandama xeyir vermək və gələcəkdə Avropada çıxış etməkdir.

Pressing.az