"Kəpəz"in braziliyalı sabiq vingeri, hazırda Tanzaniyanın "Singida Yunayted" klubunda forma geyinən Dario Junior Federiko Pressing.az-a müsahibə verib.

- Haradasan? İşlərin necədir?

- Braziliyadayam. Təşəkkür edirəm, hər şey qaydasındadır.

- Sabiq komandan “Kəpəz” də uzun illərdən sonra yenidən Premyer Liqaya qayıdıb. Ümumiyyətlə, Azərbaycan futbolunu izləyirsən?

- Bəli, izləyirəm. "Kəpəz"in elitaya qayıtmasından xəbərim var.

- "Kəpəz" azarkeşləri ötən mövsümdən bəri səni yenidən komandada görmək istəyirlər. Bununla bağlı klubdan təklif almısan?

- "Kəpəz"ə sonuncu gəlişimdə demişdim ki, sonra qayıdacağam. Düşünürəm ki, vaxt yetişib.

- Qayıtmaq istəyirsən?

- Öz evim olan "Kəpəz"ə qayıtmağı çox istəyirəm.

- Hazırda Azərbaycan Premyer Liqasında büdcəsi ən aşağı olan klub “Kəpəz”dir. Klubda maddi sıxıntı yaşanır. Aşağı maaş sənin üçün problem yaratmayacaq ki?

- Xeyr, problem olmayacaq.

- Səncə, bu, "Kəpəz"in xeyrinə olacaq?

- Bəli. Mən son bir neçə ildə "Kəpəz"in ən yaxşı oyunçusu idim, vacib qollar vurdum və komandaya vacib qələbələr qazandırdım.

- “Kəpəz” tərəfindən Azərbaycana dəvət edilməyin riskli ola bilər?

- Burada heç bir risk yoxdur. Mən həmin oyunçu, həmin insanam.

- Gəlmək istədiyini söylədin. Kimlə danışdın? Sənə nə cavab verdilər?

- "Kəpəz"də olan dostum vasitəsilə danışmışam. Özüm də sosial şəbəkələrdə bu kluba olan sevgimi ifadə edirəm, amma hələlik cavab yoxdur.

Elsevər Muradzadə