Ölkəmizdə keçirdiyi 11 mövsüm ərzində 3 klubda - "Xəzər Lənkəran", "Neftçi" və "Keşlə"də (oxu: indiki "Şamaxı") çıxış edən Denis Silva Kruz Pressing.az-a müsahibə verib.

- Denis, nə işlə məşğulsan?

- Peşəkar karyeramı başa vurmuşam. Hazırda həvəskar şəkildə futbolla məşğulam.

- Azərbaycandakı günlərini necə xatırlayırsan?

- Azərbaycan mənim ikinci vətənimdir. Mən orada gözəl günlər keçirdim. Ölkənizdə həm insan, həm də futbolçu kimi yaxşı həyatım olub.

- Burdakı dostlarınla əlaqə saxlayırsan?

- Azərbaycanda ömrümün sonuna qədər mehriban qalacağım dostlar tapdım. Bəzən onlarla əlaqə saxlayıram. Ölkəniz hər zaman ürəyimdədir.

- Azərbaycan çempionatını izləyirsən?

- Vaxt fərqinə görə biraz çətinlik olur. Amma imkan tapdıqca matçları izləməyə çalışıram.

- "Keşlə"dən ( indiki "Şamaxı" - red.) ayrılmağının səbəbi nə idi?

- Həyatın başlanğıcı, ortası və sonu var. "Keşlə'dən ayrılmağın vaxtı çatmışdı. O klubda 4 gözəl mövsüm keçirdim. Buna görə də onlara təşəkkür edirəm.

- Klub rəhbərliyi ilə hər hansı bir problem yaşamışdın?

- Xeyr, mənim klub rəhbərliyi ilə heç bir problemim olmayıb. "Keşlə"də çox xoşbəxt mövsümlər keçirdim. Ümid edirəm ki, o komanda yenidən yaxşı nailiyyətlər qazanar.

Pressing.az