Azərbaycan futbolunda multimedia sahəsində bir ilk olan "Neftçi TV"də "dairə daralır".

Pressing.az-a daxil olan yeni informasiyaya görə, klub televiziyasının fəaliyyəti məhdudlaşdırıla bilər.

Bu səbəbdən "Neftçi"nin sıralarında olan 10-dan çox əməkdaş işini itirəcəyindən narahatdır. Belə demək mümkünsə, "Neftçi TV"nin əməkdaşları öz növbələrini gözləyirlər.

Təsadüfi deyil ki, bugünlərdə "Neftçi TV"nin yaradıcı şəxslərindən biri olan Rüstəm Allahverdiyev "ağ-qaralar"dan ayrılıb. Ondan əlavə, klub televiziyasının aparıcısı olmuş məşhur teleşərhçi İsmayıl Abdullayev də "Neftçi"nin sıralarını tərk edib.

Görünən odur ki, paytaxt klubunda "yarpaq tökümü" davam edəcək.

Məsələ burasındadır ki, Azərbaycan Respublikası Audiovizual Şurası bu ilin sentyabrında "Neftçi TV"yə peykdən yayımlanması üçün lisenziya vermişdi. Fəqət hadisələr başqa yöndə cərəyan etdi və bu gün klub televiziyasının fəaliyyətini hansı formada davam etdirəcəyi sual altındadır.

Pressing.az