"Neftçi İnternational"ın patronu Azərbaycanı tərk etdi

"Neftçi" yeni mövsüm öncəsi böyük islahatlar həyata keçirdi.

Yay fasiləsində "ağ-qaralar"da ilk olaraq rəhbərlik əl dəyişdi. Klubun baş icraçı direktoru Fərrux Mahmudovu türkiyəli funksioner Cenk Sümer əvəzlədi.

Bundan əlavə, paytaxt təmsilçisinin "sükan"ı vaxtilə azərbaycanda çalışmış və kifayət qədər reputasiyası olan Roman Qriqorçuka tapşırıldı. Yeri gəlmişkən, "Neftçi"nin idman direktoru da əcnəbidir. Xəbər verdiyimiz kimi, ilinə 1 milyon manat qazanan isveçli Yens Andersson Bakı təmsilçisində bu postu tutur.

Xülasə, bütün bunlara görə Premyer Liqa klubunu "Neftçi İnternational" da adlandıra bilərik. "Neftçi" hazırda klubun strukturundakı əcnəbi adlara görə Azərbaycan futbolunun "karma"sıdır.

İndi isə keçək digər maraqlı məqama. Deməli, ilinə yarım milyon manat alan türkiyəli rəhbər vətəninə yollanıb.

Sportliqa.az-a daxil olan informasiyaya görə, o, Premyer Liqanın ilk turu çərçivəsində ötən həftə doğma meydanda "Turan Tovuz"la keçirilən matçdan (0:0) sonra Türkiyəyə qayıdıb. Funksionerin Azərbaycana nə vaxt qayıdacağı isə bəlli deyil.

Bildirək ki, "Neftçi" iki gün sonra səfərdə "Səbail"lə qarşılaşacaq.

Mahir Rəcəbov