Qadın futbolçulardan ibarət Azərbaycan millisi UEFA Millətlər Liqasının qrup mərhələsi çərçivəsində srağagün evdə Monteneqronu böyük hesabla üstələyib - 3:0.

Millimiz bu nəticədən sonra 4 oyuna topladığı 10 xalla qrupda liderdir.

Qarşılaşmadan sonra yığmamızın üzvü Vüsalə Seyfəddinova Pressing.az-ın əməkdaşının da iştirak etdiyi brifinqdə jurnalistlərin suallarını cavablandırıb. O, matçla bağlı bunları deyib:

"Qələbəyə görə çox yaxşı hisslər keçirirəm. Deyərdim ki, çox xoşbəxtəm. Vacib qalibiyyət oldu və komandamı təbrik edirəm. Çox şükür ki, istədiyimiz nəticəyə nail olduq. Qrupumuzda liderliyi qoruyub saxlayırıq".

Seyfəddinova qrupda ən güclü rəqibi məğlub etdiklərini vurğulayıb: "Hesab edirəm ki, onlara belə bir hesabla qalib gəlmək böyük uğurdu. Bu, həqiqətən bizi sevindirir və milli komandamızın nə qədər irəlilədiyini göstərir".

Futbolçu, baş məşqçi Siyasət Əsgərovun matçın ilk hissəsində daha çox onun adını çəkərək, oyunundan razı qalmadığını göstərməsinin üzərində psixoloji təzyiq yaratmadığını dilə gətirib: "Əslində, bu, bizim üçün yaxşı bir şeydir. Çünki bəzən oyunun gedişində konsentrasiyanı itirə bilirik. Baş məşqçi diqqətli olmağımız üçün qışqırırdı. Bu, bizi əsla həvəsdən düşürmür, psixoloji təzyiq etmir".

Türkiyənin "Fomget" klubunda çıxış edən yarımmüdafiəçi legioner həyatı yaşamalarının millimiz üçün faydasından söz açıb: "Hazırda heyətimizin 99 faizi xarici klublarda çıxış edir. Özü də yüksək liqalarda top qovuruq. Onların da səviyyəsi çox yaxşıdı. Hər həftə oyunlar olur və sonda millinin təlim-məşq toplanışına hazır vəziyyətdə gəlirik. Bu da yığmanın matçlarında görünür. Toplanışa çox yaxşı başlamışdıq, çox yaxşı da bitirdik".

Millimizin üzvü sona 2 tur qalmış qrup qalibi olmaq şanslarımızı isə belə dəyərləndirib: "70 faiz bu vəzifənin öhdəsindən gəldiyimizi düşünürəm. Monteneqro ilə matç ona görə bizə önəmli idi ki, ən yaxın izləyicimizlə görüşürdük və arada xal fərqini 4-ə yüksəltdik. Qarşıdakı iki matç da bizim üçün vacibdi. Bu görüşlərdə də qələbələri sıralamaq istəyirik və bu, bizi daha motivasiya edir. Önümüzdəki oyunlara daha ciddi hazırlaşacağıq. Arxayınlıq olmayacaq, çünki peşəkarıq. Hər şeyə ciddi yanaşırıq".

Bildirək ki, hazırda 10 xalla qrupda vahid lider olan qadın yığmamız son 2 oyununu səfərdə Kirp və evdə Farer adalarıyla keçirəcək.

Elsevər Muradzadə