“Neftçi” klubunun baş məşqçisi Samir Abasov Premyer Liqanın 30-cu turu çərçivəsində “Zirə”yə qarşı keçirdikləri oyunu şərh edib.

Pressing.az xəbər verir ki, o, 2:4 hesablı məğlubiyyəti belə şərh edib:

“Biz problemlərimizi bilirik. Bu, həddindən artıq çətin prosesdir. Biz üstün olsaq da, bəzi kompenentlər var ki, onları dəyişə bilmirik. Burada bizə əks olan nüanslar həddindən artıq çoxdur. Bunları indi həll edə bilmirik. Gizlədiləsi heç bir şey yoxdur. Bunu nəinki biz deyirik, statistikalar da göstərir. Bizim üçün tək şans kubok oyunlarında qalib gəlməkdir. Həddindən artıq çox çətin oyunlara gedirik. Daha yaxşı oynamalıyıq. Bu mövsümü bizim üçün xilas edəcək oyun göstərməliyik, lakin bunu etmək bu mövsüm çox çətin görünür. Lakin təbii ki, əl-qolumuzu sallamalı deyilik. Geri dönüşə inanıram. Bizim kimi “Sabah” üçün də kubok son çıxış yolu kimi görünür. Əlbəttə, inanıram. Komandanı da inandırmağa çalışacağıq.

Özümüzdə təbii ki, günah görürük. Bu, yalnız məşqçidən qaynaqlanmır. Çətin, problemli komandanı götürmüşük. Bunu düzəltmək təbii ki, çətindir. Bunun sonunda da günahkar kimi baş məşqçini görürlər. “Neftçi”də işləmək “Sumqayıt”da işləməkdən daha çətindir. Sənin qabağında bir iddian var və bu yolu rahat gedə bilirsən. Lakin burada hər şeyin sonunda qələbə olmalı olduğu üçün bu, çətindir. Mən bunları göz qabağına alıb gəlmişəm. Son sözümüz iddialı komanda olmaqdır.

Həmkarlarımla çox yaxşı münasibətdəyəm. Çox şükür ki, futbolda azlıq da olsa, Rəşad Sadıqov kimi öz duruşunu saxlayan məşqçilər var”.