Kaxaber Sxadadze: "Bu komanda daha yaxşı nəticələr əldə edə bilər"

Misli Premyer Liqasında 2026/2027 mövsümünə start verilib. Birinci turun ilk oyunu Tovuzda keçirilib. "Qəbələ" səfərdə "Turan Tovuz"la qarşılaşıb. Qarşılaşma Qəbələ təmsilçisinin 0:1 hesablı məğlubiyyəti ilə yekunlaşıb.

Pressing.az xəbər verir ki, "Qəbələ"nin baş məşqçisi Kaxaber Sxadadze matçdan sonra oyun haqda fikirlərini bildirib:

"Turan Tovuz”u da bugünkü qələbə münasibətilə təbrik edirəm. Həmçinin “Sabah”ı və “Qarabağ”ı avrokuboklardakı uğurlu çıxışları münasibətilə təbrik edirəm. İnanıram ki, onlar eyni ruhda davam edəcəklər.

Maraqlı oyun alındı, meydanda bərabər mübarizə gördük. İlk hissədə bir səhvə yol verdik və nəticədə qol buraxdıq. Ümumilikdə, “Turan Tovuz”un ciddi qol epizodları çox olmadı. İkinci hissədə rəqibə təzyiq göstərə bildik və daha yaxşı oynadıq. Lakin son ötürmələrdə və zərbələrdə soyuqqanlılıq çatmadı. Bu heyətlə ilk oyunumuzu keçirdik. Yoldaşlıq görüşlərində bu heyətlə oynamamışdıq. Mən bu komandanın potensialını gördüm. Düşünürəm ki, bu komanda daha yaxşı nəticələr əldə edə bilər".

- “Qəbələ” rəsmisi Səbuhi Səfiyarlı komandanın məqsədinin liqada yerini qorumaq olduğunu deyib. Siz nə düşünürsünüz?

- Bugünkü oyunda komandada böyük potensial gördüm və ümid edirəm ki, bunu göstərəcək. Bu gün ötən mövsümü üçüncü pillədə başa vurmuş klubla oynadıq və ondan heç nədə geri qalmadıq. Bəzi epizodlarda hətta daha yaxşı idik.

- Ambisiyası olmayan klubda psixoloji baxımdan işləmək necədir?

- Həyat belədir. Güclü olmaq lazımdır. Hamı bilir ki, mənim təcrübəm var, bu baxımdan problemim yoxdur.