"Sumqayıt" klubu Misli Premyer Liqasının 8-ci turunda doğma meydanda "Karvan-Yevlax"ı 4:1 hesabı ilə məğlub edib.

Pressing.az xəbər verir ki, "kimyaçılar"ın baş məşqçisi Saşa İliç oyundan sonra keçirilən mətbuat konfransında jurnalistlərin suallarını cavablandırıb:

- Uğursuz seriyadan sonra qələbə qazanmaq xoşdur. Amma oyundan tam razı deyiləm.

- Komanda bir çox qol fürsətlərini dəyərləndirə bilmədi. Bu barədə nə deyə bilərsiniz?

- Tam heyəti yığmaqda problem yaşayırıq. Rəşidin zədəsi var, Rüstəm və Səbuhi milli komandada idilər. Bəzi gənc oyunçulara şans verdik. İndiki məqamda əsas məqsədimiz odur ki, optimal heyətlə bir neçə oyun oynayaq.

- Narazı qaldığınız məqamlar hansılardır?

- Qələbəyə görə sevinirəm. Amma mənim planlaşdırdığım oyunu bu gün tam olaraq görə bilmədik. Bəzi oyunçuların fərdi səhvləri oldu.

- Qış transfer pəncərəsi zamanı Serbiyadan tanıdığınız futbolçuları "Sumqayıt"a dəvət etməyi düşünürsünüz?

- Mənim üçün futbolçunun hansı ölkədən olması önəmli deyil. Əsas onun faydalı olmasıdır. Qışda bizə yeni oyunçular lazım olacaq.

- Qarşıdakı turlarda "Zirə", "Araz-Naxçıvan" və "Qarabağ"la oyunlar olacaq. Həmin matçlar üçün üsusi planınız var?

- Düz qeyd edirsiz, bizi qarşıda çətin oyunlar gözləyir. Hazırda növbəti turun matçını düşünürük. Mənim futbolçulardan tələb etdiyim oyunlara 100 faiz hazır olmalarıdır. Bütün məşqlərimiz də buna yönəlib.(sportal.az)