"Oyuna çox yaxşı hazırlaşmışdıq. İki gün idi ki, buradaydıq. Pis başlamadıq. Meydança səviyyədə deyildi ki, istədiyini edəsən. Bu oyunda qazandığımız bir xalı normal hesab edirəm. Qarşıdan gələn "Sabah" matçına hazırlaşacağıq".

Pressing.az xəbər verir ki, bu sözləri "Zirə"nin müdafiəçisi Qismət Alıyev deyib. 26 yaşlı futbolçu Azərbaycan Premyer Liqasının 26-cı turu çərçivəsində səfərdə "Kəpəz"lə heç-heçə etdikləri matçdan (1:1) sonra əməkdaşımızın suallarını cavablandırıb.

- Bu gün xal itirdiniz. Sabah "Qəbələ" qalib gələrsə, xal fərqi ikiyə enəcək. Bu, avrokubokara yollanmaq şanslarınızı azalda bilər?

- İndidən nəsə demək çətindir. Demək olar ki, üst pillələrdə qərarlaşan komandaların hamısı Gəncədəki oyunda xal itirib. "Qarabağ" və "Sabah" da həmçinin. Biz də, bu gün qalib də gələ bilərdik, uduza da bilərdik. "Qəbələ" "Turan Tovuz"la oynayacaq. Düzü, bizim üçün maraqlı deyil. Biz özümüz öz oyunlarımızı düşünürük. Yəni, biz fikirləşməyəcəyik ki, "Qəbələ" xal itirsin, biz qalib gəlib avrokuboklara yollanaq. Hər şey özümüzdən asıldıır.

- Matçı izləyənlər arasında Canni de Byazi də var idi. Milliyə dəvət olunmaq şansını necə dəyərləndirirsən?

- Milli komandada oynamaq üçün hər bir futbolçu əlindən gələni etməyə hazırdır. Yenə də, dəvət olarsa, əlimdən gələnin ən yaxşısını edəcəm. Millinin baş məşqçisinin seçimidir. Çağırarsa, ən yaxşısını etməyə çalışacam.

Elsevər Muradzadə, Bakı-Gəncə