"Sabah" olaraq hakimlər barəsində danışmırıq" – Vasili Berezutski

"Sabah" klubunun baş məşqçisi Vasili Berezutski Misli Premyer Liqasının 25-ci turunda "Araz-Naxçıvan"la 2:2 hesablı heç-heçə etdikləri oyundan danışıb.

Pressing.az xəbər verir ki, o, görüşdən sonra keçirilən mətbuat konfransında deyib:

- Bu oyunda bir balaca üstünlüyümüz var idi. Qollarımızı da vurduq. Amma qolları vurduqdan sonra, asanlıqla qollar buraxdıq. Nəsə demək çətindir. İki qol vurduqdan sonra bu qədər asan qollar buraxmamalıyıq.

- Buraxılan qolları konsentrasiyaya bağlamaq olar?

- Bəzən konsentrasiya futbolda kifayət qədər qiymət verilməyən dəyərdir. Konsentrasiyanın itməsi nəticəsində qapıda qollar görülür. Yüksək hədəflər uğrunda mübarizə aparan komanda üçün qısa müddətlik olsa belə, konsentrasiyanı itirmək qəbuledilməzdir.

- Çempionatdan avrokuboka yollanmağınız çətin görünür. Demək olar ki, komandanı daha çox kubok oyunlarına kökləməlisiniz?

- Biz hələ heç nə itirməmişik. Çempionatdakı oyunların nəticələri də çox vaxt gözlənilməz olur. Bizim məqsədimiz çıxdığımız hər oyunda qalib gəlməkdir.

- Samir Abasov "Kəpəz"lə kubok görüşündən sonra Sambunun qırmızı vərəqə verilməsinin qəsdən olduğunu deyərək, "Sabah"la görüş üçün düşünülmüş addım olduğuna eyham vurub...

- Qırmızı vərəqə epizodunu görməmişəm, nəsə deyə bilmərəm. Daha çox "Sabah"ın oyunlarına köklənmişəm. Çox nadir hallarda başqa komandalar haqda fikir bildirirəm. Nəsə demək çətindir. Biz "Sabah" olaraq heç vaxt hakimlər barəsində danışmırıq. Oyunda qırmızı vərəqə də futbolun bir hissəsidir. (sportal.az)