30 illik işğal dövrü bitdikdən sonra Azərbaycan azad edilmiş bölgələrdə tikinti-quruculuq işlərinə start verib. Bu mənada, bir neçə gün əvvəl ölkə başçısı İlham Əliyev Ağdam şəhərində "İmarət" stadionunun da təməlini qoyub.

Bu hadisə ən çox "Qarabağ"ı sevindirməli idi, lakin bunu görə bilmədik. Nə klub rəsmiləri, nə futbolçular, nə də "Qarabağ"ın sosial media hesablarında bu tarixi hadisəylə bağlı bir paylaşım belə edilmədi.

Ötən gün bu məsələyə toxunmuşduq. Yazının sonunda isə "Qarabağ" "İmarət"ə getmək istəyirmi" ritorik sualını qoymuşduq.

Gözlədik ki, bəlkə Ağdam təmsilçisinin baş məşqçisi Qurban Qurbanov dünən "Neftçi" ilə keçirilən oyundan (4:0) sonra bu barədə danışar. Çünki Qurbanov illərdir həm yerli mətbu orqanlara, həm də zaman-zaman xarici telekanallara müsahibələrində, qürbətdə baş tutan mətbuat konfranslarında Ağdama, "İmarət"ə qayıtmaq üçün "gün saydıqlarını" deyirdi. Lakin o da dünən bu barədə danışmadı. Matçdan sonra təşkil olunan mətbuat konfransındakı giriş nitqində Azərbaycanın Dövlət Suverenliyi Günü münasibətilə xalqımızı təbrik edən hoca, nədənsə, "Qarabağ" üçün əvəzolunmaz hadisəylə bağlı bir kəlmə də danışmadı.

Deyə bilərsiniz ki, danışıb axı. Bəli, danışıb, o da jurnalistin sualını cavablandırarkən. Hoca da könüllü şəkildə evə geridönüşdən bəhs etmək istəmədi.

Belə məlum olur ki, deyəsən, Qurban Qurbanov da bu məsələdə maraqlı deyilmiş. Görünür, ümumiyyətlə, "Qarabağ" camiəsi Ağdama qayıtmağa can atmır.

Tarıyel