"Lunyov bu matçda əlindən gələnin ən yaxşısını etdi" - AÇIQLAMA

"Qarabağ" ötən gün UEFA Avropa Liqasının qrup mərhələsinin son oyununda Bakıda İsveçin "Hekken" klubuna qalib gələrək (2:1) pley-off mərhələsinə vəsiqə qazanıb.

Ağdam təmsilçisinin heyətində matçda özünü ən yaxşı tərəfdən göstərənlərdən biri də qapıçı Andrey Lunyov idi. Rusiyalı qolkiper inamlı oyunu, kritik qurtarışları ilə "Tofiq Bəhramov"a toplaşan 30 minə yaxın tamaşaçıdan alqış qoparmağı bacarıb.

U-16 millimizin qapıçılar üzrə məşqçisi Etibar Tarverdiyev Pressing.az-a açıqlamasında 32 yaşlı "əlcək sahibi"nin performansı haqda bunları deyib:

"İlk növbədə "Qarabağ"ı, Azərbaycan futbol camiəsini bu tarixi uğur münasibətilə təbrik edirəm. Bu nailiyyət Azərbaycan, "Qarabağ" adına çox xoşdur. Lunyov yüksək səviyyədə çıxış etdi. Çox soyuqqanlı idi. Bir neçə epizodda kritik müdaxilələr etdi. O, bu matçda əlindən gələnin ən yaxşısını etdi".

Pressing.az