Cari mövsüm Azərbaycan Premyer Liqasında inamlı çıxışı ilə adından söz etdirməyi bacaran futbolçulardan biri də Rza Cəfərovdur.

"Neftçi"nin 20 yaşlı qolkiperi geridə qalan dövrədə etdiyi kritik qurtarışlar, inamlı oyunu ilə diqqətləri üzərinə çəkməyi bacarıb.

"Neftçi"də çalışdığı dövrdə gənc "əlcək sahibi"nin məşqçisi olmuş Etibar Tarıverdiyev Pressing.az-a açıqlamasında Cəfərovla bağlı bunları deyib:

"İkinci il idi ki, "Neftçi"də çalışırdım. Akademiyanın koordinatoru Mehman Alimov mənə dedi ki, Rza Cəfərovun hərbi xidmət yaşı çatıb, bir də "Sabah" klubu onu sıralarına cəlb etmək istəyir. Həmin vaxtlarda da bizim qapıçıların çoxu zədəli idi. Bu səbəbdən də məşqlərdə planlar pozulurdu. Alimova bildirdim ki, Rzanı dəvət et, baxaq. İki-üç gün Rzanı izlədikdən sonra bildim ki, onun çox yaxşı potensialı var. Həm mental baxımdan - disiplin, özünü aparması, həm də digər keyfiyyətlərdə üstün idi. "Neftçi"də qaldığım müddətdə bacardığım qədər Rzaya dəstək olmağa çalışdım. Onun inkişafı ilə bağlı böyük planlarım vardı. Lakin əfsuslar olsun ki, "Neftçi"dəki işimizə xitam verildi, hər şey yarımçıq qaldı. Amma görünən budur ki, Cəfərov gündən-günə inkişaf edir. Oyunu qənaətbəxşdir. Yəni, müəyyən məsələlər var, onların üzərində də işləsə, yaxın gələcəkdə Azərbaycanın böyük perspektiv vəd edən qapıçısı olacaq".

Daşqın Əziz