"Qarabağ" mükəmməl oyun keçirdi. Qələbə qazanmağa layiq olan tərəf təmsilçimiz idi. Matçın sonlarına yaxın qələbə topunu vurmaqçün irəli atıldılar və təəssüf ki, rəqib yaranan ani boşluqdan istifadə etdi. Hər zaman demişəm, bu, futboldur, belə şeylər olur".

Bu sözləri Pressing.az-a açıqlamasında Azərbaycan millisinin və "Qarabağ"ın sabiq üzvü, hazırda "Kəpəz"də çıxış edən Əfran İsmayılov deyib. 34 yaşlı vinger Ağdam təmsilçisinin UEFA Avropa Liqasının qrup mərhələsinin 5-ci turunda Fransa "Nant"ı ilə keçirdiyi cavab oyunu (2:1) haqda danışıb.

İsmayılov görüşdə ilk qolun buraxılmasında səhv etməsiylə yadda qalan Şahruddin Məhəmmədəliyevin çıxışına da toxunub:

"Şahruddin Azərbaycanın 1 nömrəli qapıçısıdır. Dünyada istənilən klubda forma geyinən, hətta qiyməti milyonlarla olan qapıçılar da bu səhvləri edirlər. Şahruddin həmin oyunun ən yaxşılarından biri idi, mükəmməl qurtarışlar etdi. İnanıram ki, qarşıdakı oyunlarda inamlı çıxış edərək, yenə də millinin və "Qarabağ"ın əsas qolkiperi olduğunu sübut edəcək".

O, "Qarabağ"ın son turda Almaniyanın "Frayburq" komandası ilə keçiriləcək oyunundan gözləntilərini də dilə gətirib:

"Qarabağ" Bakıda "Frayburq"a qalib gələ bilər. Niyə də olmasın?! Almaniyadakı ilk oyunda da çox yaxşı oyun keçirmişdi. Ümid edirəm ki, evdə keçiriləcək görüşdə qalib gələn tərəf məhz "Qarabağ" olacaq".

Pressing.az