"Koxalskini "Qarabağ"ın ən yaxşı transferlərindən saymaq olar" – AÇIQLAMA

"Koxalski ötən gecə komandanın ən yaxşısı idi. Oyun boyu ciddi qurtarışlar etdi. Üstəgəl, penalti zərbəsini də dəf etdi. Təəssüf ki, nəticə ürəkaçan olmadı, "Qarabağ" məğlubiyyətlə üzləşdi, amma təmsilçimizin heyətində ən yaxşı Mateuş Koxalski idi".

Bu sözləri Pressing.az-a açıqlamasında Azərbaycan millisinin və "Qarabağ"ın sabiq qolkiperi, hazırda "Zirə" klubunda qapıçı hazırlığı üzrə məşqçi kimi çalışan Fərhad Vəliyev deyib.

O, Koxalski ilə yanaşı, indiyədək "Qarabağ"ın formasını geyinmiş bir neçə qapıçının da çıxışını təqdir edib:

"Tarixə göz gəzdirdikdə, "Qarabağ"da bir neçə yaxşı qapıçının çıxış etdiyini deyə bilərəm. Məsələn, İbrahim Şehiç, o cümlədən komandada az çıxış etsə də, Asmir Beqoviçin adını çəkmək yerinə düşər. Koxalskini də, əlbəttə, "Qarabağ"ın ən yaxşı transferlərindən biri saymaq olar".

Xatırladaq ki, "Qarabağ" UEFA Çempionlar Liqasının Liqa mərhələsinin 5-ci turunda ötən gecə səfərdə "Napoli" ilə qarşılaşıb və 0:2 hesabıyla məğlub olub. Qarşılaşmada Ağdam təmsilçisinin qapıçısı Mateuş Koxalski penalti zərbəsini dəf etməklə yanaşı, kritik qurtarışları ilə də yadda qalıb.

Daşqın Əziz