Ötən həftə "Zirə" doğma meydanda penaltilər seriyasında "Osiyek"i mübarizədən kənarlaşdırmaqla Konfrans Liqasının pley-offuna vəsiqəni təmin etdi.

Təbii ki, bu uğurun əsas pay sahibi "qartallar"ın qolkiperi Tiyaqo Silvadır. Məhz "əlcək sahibi"nin penaltilər lotoreyasında rəqibin 4 zərbəsini dəf etməklə komandasını növbəti mərhələyə daşıdı.

Pressing.az qapıçının çıxışıyla bağlı "Zirə"nin qolkiperlərlə işləyən məşqçisi Fərhad Vəliyevin fikirlərini öyrənib:

"Tiaqo Silva artıq ikinci ilə keçir ki, bizimlədir. Ötən mövsümü pis keçirmədi. Qapısında ən az top buraxan qolkiper kimi diqqət çəkdi".

Veteran qolkiper Tiyaqonun ötən həftə penaltilər seriyasındakı seyvlərindən də söz açdı:

"Xorvatiyadakı matçdan sonra "Osiyek"in üzvlərinin hər birini olduqca ciddi analiz etmişdik. Eləcə də rəqib futbolçuların duran toplarlada kimlərin daha yaxşı zərbələr vurmasını, həmçinin penaltilərdən necə yararlanmalarıyla bağlı da məşqlərdə qapıçımıza təlimat və göstərişlərimizi vermişdik. Təbii ki, məşqdə nə qədər tapşırıq versən də, əsas olan meydandakı reallıqda onu həyata keçirməkdi. Ümumi götürəndə, "Osiyek"lə oyunda hər bir futbolçumuz xaraktet göstərdi. Tiyaqonun penaltilər duelindəki ardıcıl qurtarışlarına gəlincə, səmimi deyim ki, bunu çoxları mən də gözləmirdim. Çox nadir hallarda penaltilər seriyasında qarşılıqlı qurtarışlar olur. Bu mərhələ sanki "Zirə" - "Osiyek" yox, Tiaqo Silva ilə rəqib qapıçının dueliydi. Səmimi demək lazımdı ki, xorvatların "əlcək sahib"inin də performansı üstün idi. Amma sonda Tiyaqomuz onu üstələdi. 90 dəqiqə və əlavə olunan vaxtda komandamız əzmlə döyüşüb hər dəfə hesabı bərabərləşdirdisə, penaltilər seriyasınsa qapıçımız təkbaşıba "Zirə" üçün döyüşdü. Ümid edirəm Tiyaqo bundan da yaxşı çıxış edəcək. Başda portuqaliyalı olmaqla bütün klub əhlimiz təbrik edir, qarşıdakı oyunlarda da uğurlar arzu edirəm".

ABDULLA İSMAYILOĞLU, Pressing.az üçün