Ötən gün Azərbaycan futbolunda milli səviyyəsində bir ilkə şahidlik etdik. Hərçənd kişi futbolçulardan bu uğuru görmək istəsək də, qadınlardan ibarət yığmamız UEFA Millətlər Liqasının C Divizionunda 13 xal toplayaraq, B Divizionuna vəsiqə qazandı.

Buna görə qızlara böyük alqış düşür. İllərdir rüsvayçı hesablar, fiasko sayılan nəticələrlə Azərbaycan futbolsevərlərini üzən zərif cinsin nümayəndələri, nəhayət, onların könlünü almağı bacardılar. Bu, həm də kişilərin uğursuzluqları fonunda Azərbaycan futboluna könül verənlərin təsəllisi oldu.

Xülasə, bizlərə qızları təbrik etmək və tonusdan düşməməyi arzulamaq qalır.

İndi isə incə detala toxunaq. Deməli, Azərbaycan millisinin bu matçı (oxu: Kipr - Azərbaycan - 0:1) futbolsevərlərə canlı yayımda təqdim edilməyib. Bu necə ola bilər ki, millimiz tarixi oyuna çıxır və Azərbaycan Futbol Federasiyaları Assosiasiyası həmin qarşılaşmanı canlı yayımda təqdim edə bilmir.

Müasir texnologiyanın, innovasiyaların bəşəriyyətə hökmranlıq etdiyi bir dövrdə bunun baş tutmamasının bir açıqlaması varmı? 30 milyon büdcəsi olan federasiya futbolsevərlərin belə bir matçı mavi ekranlar qarşısında izləməsinə şərait yarada bilmir...

Ölkənin bir nömrəli futbol qurumuna nümunə - Peşəkar Futbol Liqası. Məsələn, bu qurum bir kamera ilə Birinci və İkinci Liqa matçlarını canlı yayımda təqdim edir. Bu mövsümdən Azərbaycan futbolunda liqaların sayının artırılmasını da nəzərə alsaq, PFL-in bu fədakarlığına "5", millimizin vacib oyununun canlı yayımını təşkil edə bilməyərək, futbolsevərləri intizarda qoyan AFFA-ya isə "yağlı 2" düşür...

Pressing.az