Xatırlayırsınızsa, Azərbaycan Premyer Liqasının 9-cu turunda keçirilən "Neftçi" - "Qarabağ" matçından (2:0) sonra Ağdam təmsilçisinin sol cinah müdafiəçisi Elvin Cəfərquliyevlə yeniyetmə arasında insident yaşanmışdı.

Futbolçunun papaq və çantasını götürərək qaçmağa çalışan şəxslə Cəfərquliyev arasında yaranan qalmaqal əlbəyaxa davaya keçmişdi. Yeniyetməyə fiziki təzyiq edən Elvin hüquq mühafizə orqanları əməkdaşları tərəfindən ərazi üzrə polis bölməsinə aparılmışdı.

... Elvin hazırda "Qarabağ" və Azərbaycan millisinin aparıcı oyunçularından biridir. Təsadüfi deyil ki, yayda 23 yaşlı müdafiəçiyə Belçikanın adlı-sanlı "Anderlext" klubundan təklif də gəlmişdi. Karyerasının yüksəliş çağında futbolçunun bu cür davranışı təbii ki, xoş hal deyil. Bu, hardasa "ulduz xəstəliyi"nin əlamətlərindən də sayıla bilər... Bu cür məqamlardan danışanda, ilk olaraq ağla Araz Abdullayev gəlir. O da vaxtilə karyerasının çiçəklənən dövründə bu cür qalmaqallarla gündəmə gəlir, dillərdən düşmürdü. Bəs sonra?..

Hadisənin üzərindən bir aydan çox vaxt keçib və hələ də Elvin Cəfərquliyevin bu məsələsinin "bağlanıb-bağlanılmaması" ilə bağlı klubdan heç bir məlumat, açıqlama verilmir.

***
İki gün əvvəl "Qarabağ" adına daha bir qalmaqal yaşandı. Belə ki, "köhlən atlar"ın Avropa Liqasının qrup mərhələsində Bakıda Leverkuzen "Bayer"i ilə oyununun (0:1) fasiləsində əməlli-başlı dava düşdü. Matçın fasiləsində qapı arxasında "sözləri bir-birinin boğazından keçməyən" yeniyetmələr ( "Qarabağ"ın akademiyasının futbolçuları - red.) yumruqları işə saldılar. Həmin anları əks etdirən görüntülər isə tez bir zamanda sosial şəbəkələrdə yayıldı və birmənalı qarşılanmadı.

"Qarabağ" bu məsələnin də üzərindən sakitcə keçməyi məsləhət bilir. Ağdam klubundan bu barədə heç bir reaksiya bildirilməyib.

Klub susur, Cəfərquliyevi özlərinə "ideal" seçən yeniyetmələrin tənbeh edilməməsi isə futbolumuzun sabahı adına minusdur...

Pressing.az