UEFA Millətlər Liqasında sabah keçiriləcək Azərbaycan - İsveç matçından öncə millimizin baş məşqçisi Fernandu Santuşun iştirakı ilə mətbuat konfransı təşkil olunub.

Pressing.az xəbər verir ki, təcrübəli mütəxəssis jurnalistlərin suallarını cavablandırıb.

- Artıq komandanı məşqə çıxarmısız. Futbolçulardan gözləntiniz nədir?

- Artıq bir məşqimiz olub, bu gün ikinci məşq baş tutacaq. Məşqdən öncəki iclaslarda komandanın zəif nöqtələrini müzakirə etmişik. Futbolçulardan texniki olaraq bəzi narazılıqlarım vardı və onun ətrafında diskussiyalarımız oldu. Oyunçular da başa düşürlər ki, çətin olacaq, amma onlarda qələbə istəyi görürəm. Futbolçuların oyunu milli komandaya uyğunlaşmalıdır.

- Əvvəlki mətbuat konfranslarında daha pozitiv görünürdüz, bu gün sanki qayğılısız. Nə düşünürsünüz?

- Mənim kefim çox yaxşıdır. Hər şey normaldır. Sabah çətin oyunumuz var, buna konsentrasiya olmuşuq. Rəqibimiz kifayət qədər ciddi komandadır. İsveç millisinin yeni baş məşqçisinin rəhbərliyi altındakı son 4 oyununu izləmişik. Çünki bundan öncəki matçlar bizə maraqlı deyildi. Çalışdıq ki, rəqibin zəif nöqtələrini tapaq və ona fokuslanaq. Məşqlərdə futbolçulara izah etdiyimiz əsas məqam o oldu ki, hücum və əks-hücumlarda necə davranmalıyıq.

- Srağagün millinin heyətini açıqlayarkən, işlətdiyiniz bəzi ifadələr mətbuatda müzakirələrə səbəb oldu. Bu, başverəcək prosesləri sığortalamaq üçün idi?

- Mən futbolçuların fiziki durumları ilə bağlı heç bir problem görmürəm. Klublardan gəliblər və kifayət qədər yaxşı formadadırlar. Səbirli olun, sabah hər şeyi görəcəksiniz.

- Azərbaycan millisində seçəcəyiniz lider futbolçu kim olacaq?

- Biz komandayıq. İndividual olaraq heç kimi fərqləndirmirəm.

- Maraqlıdır ki, Nəriman Axundzadəni nəyə görə milliyə cəlb etmisiz?

- Mən oyunçular haqda individual olaraq danışmaq istəmirəm.

- Start heyətində hansı qapıçıya güvənəcəksiz?

- Əsas heyət haqda hələ ki qərar verilməyib. Bu barədə nəsə deyə bilmərəm.